Danssetrið hlýtur styrk frá Krónunni

Krónan hefur nú valið þau fjórtán verkefni sem hljóta samfélagsstyrk frá Krónunni í ár. Meðal þeirra sem hlutu styrk er Danssetrið á Akureyri, sem fær styrk fyrir kaupum á búnaði fyrir barnajóga og danskennslu. 

Þetta kemur fram í fréttatilkynningu frá Krónunni og þar kemur einnig fram að langflestir styrkhafanna séu staðsettir á landsbyggðinni, í nærsamfélagi verslana Krónunnar. Í tilkynningunni kemur einnig fram að Krónan hafi veitt þessa samfélagsstyrki frá árinu 2013 en á síðustu árum hafi áhersla verið lögð á að ýta undir verkefni sem stuðla að umhverfisvitund eða aukinni lýðheilsu, þar sem sjónum er einkum beint að ungu kynslóðinni.

Danssetrið var stofnað árið 2023 og er vettvangur fyrir þau sem vilja kynnast eigin getu og styrkleikum í gegnum hreyfingu. Lögð er áhersla á að sameina hreyfingu, sköpun og sjálfstyrkingu á jákvæðan og uppbyggilegan hátt. Með fjölbreyttu námskeiðsframboði vill Danssetrið skapa rými þar sem börn, ungmenni og fullorðnir geta notið hreyfingar á eigin forsendum, aukið sjálfstraust sitt og fundið gleði í tjáningu.

Ingunn Elísabet Hreinsdóttir hjá Danssetrinu segir í tilkynningunni að þau séu Krónunni afar þakklát fyrir styrkinn, sem muni nýtast í námskeiðahaldi fyrir börn á svæðinu. „Markmið námskeiða okkar í skapandi dansi og barnajóga er að skapa öruggt, uppbyggilegt og hvetjandi umhverfi, þar sem börn á leikskólaaldri fá tækifæri til að njóta hreyfingar á eigin forsendum. Styrkurinn mun nýtast til að fjárfesta í nauðsynlegum búnaði, svo sem dýnum, slæðum og mottum og þökkum við Krónunni kærlega fyrir aðstoðina,“ segir Ingunn Elísabet Hreinsdóttir.