Fara í efni
Fréttir

Dagur á leið heim til KA á ný

Dagur Gautason og  Stefánsson, formaður handknattleiksdeildar KA, handsala samninginn. Mynd af vef K…
Dagur Gautason og Stefánsson, formaður handknattleiksdeildar KA, handsala samninginn. Mynd af vef KA.

Handboltmaðurinn snjalli, Dagur Gautason, gengur til liðs við KA á ný á næstu leiktíð. Frá þessu var greint á heimasíðu KA fyrr í dag.

Dagur, sem er 22 ára og leikur í vinstra horninu, er uppalinn hjá KA en hefur leikið undanfarin tvö ár með liði Stjörnunnar í Garðabæ.

„Það er gríðarlega jákvætt skref að fá Dag aftur heim en Dagur var meðal annars kallaður til liðs við A-landslið Íslands á Evrópumeistaramótinu sem fram fór í janúar á þessu ári,“ segir á heimasíðu KA.

„Dagur lék sína fyrstu meistaraflokksleiki tímabilið 2017-2018 er KA fór aftur að leika undir eigin merki og skoraði meðal annars ótrúlegt sigurmark á lokasekúndu fyrsta leiks liðsins fyrir troðfullu KA-heimili sem setti tóninn er liðið fór upp í deild þeirra bestu. Dagur lék ótal leiki fyrir öll unglingalandslið Íslands og fór bæði á EM og HM með unglingalandsliðunum.

Þá var hann valinn besti ungi leikmaðurinn í Olísdeildinni veturinn 2019-2020 en hann var markahæsti leikmaður KA það tímabilið en í kjölfarið gekk hann í raðir Stjörnunnar í Garðabæ. Hjá Stjörnunni hefur Dagur verið í algjöru lykilhlutverki og var eins og áður segir kallaður til liðs við A-landslið Íslands á EM fyrr á árinu.“