Bleik kvöldopnun á Glerártorgi í kvöld

Í tilefni af Bleikum október verður bleik kvöldopnun á Glerártorgi í kvöld, 9. október, í samstarfi við Krabbameinsfélag Akureyrar og nágrennis. Opið verður frá 10-22. „Það verður sannarlega líf og fjör alla helgina þar sem vinkonur, vinir, pör og fjölskyldur koma saman og njóta þess að eiga góðar stundir á Glerártorgi,“ segja Elva Ýr Kristjánsdóttir og Kristín Anna Kristjánsdóttir, verkefnastjórar markaðsmála. „Kvöldopnunin hefur verið ein sú vinsælasta á Glerártorgi undanfarin ár en það verða frábær tilboð í verslunum Glerártorgs alla helgina.“ 

Krabbameinsfélagið verður með sölubás á svæðinu frá kl. 15-17 og 20-22 og Brakkasamtökin sýna áhrifaríka ljósmyndasýningu: Of ung fyrir krabbamein – Saga Sóleyjar sem stendur út október. Gestir eru hvattir til þess að kíkja í bleikan kassa staðsettan hjá sýningunni með skemmtilegum leik. 

Salsa, spádómar, lifandi tónlist og margt fleira

„Það verða fjölbreyttar kynningar meðal annars frá BIO Effect, Halldóri Jónssyni, Vera Design, Sorgarmiðstöðinni og einnig verða kynningar og ráðgjöf í Lyf og heilsu,“ segir Elva Ýr. „Þar verður boðið upp á fría snyrtingu og lökkun sem fylgir með í kaupbæti ef verslað er OPI naglalakk. Blush verður með sölubás og lukkuhjól fyrir þá sem þar versla eftir kl. 18.“ 

„Þá munu fyrirtæki á borð við Kjörís að gefa Bestís eftir kl. 16:00, Heildverslunin Steindal að bjóða upp á Happy Monkey eftir kl. 16, Töst og Rosé Lemonade eftir kl 19:30 og MS með óðalsosta smakk. Sunna Spákona spáir fyrir gesti og gangandi milli 20:00 og 22:00 og Salsa North verður með danskennslu kl. 20:00 í salsa og bachata. Góðir tónar munu óma um húsið fram eftir kvöldi en Kristján Edelstein og Stefán Ingólfs munu sjá um huggulega stemningu á göngugötunni og DJ Helga Margrét spilar góða tóna í Lindex,“ segir Kristín Anna, en það er ljóst að nóg verður á boðstólnum fyrir gesti kvöldsins. Dagskráin hefst um hádegi og stendur fram eftir kvöldi.

Geðvernd og PubQuiz um helgina 

„Það verður svo fleira á döfinni hjá okkur á Glerártorgi um helgina, en föstudaginn 10. Október er alþjóðlegi geðheilbrigðisdagurinn og verður kynning á starfsemi Grófarinnar og Geðverndarfélaginu milli kl. 14 og 17:30,“ segir Elva Ýr. „Laugardaginn 11. Október verður svo PubQuiz með Ása Guðna í Iðunni Mathöll frá kl. 20-22. Tilvalin skemmtun fyrir alla.“