Blak: KA einum sigri frá titlinum

KA sigraði Reykjavíkur-Þróttara örugglega í þremur hrinum í þriðju viðureign liðanna um Íslandsmeistaratitilinn í blaki karla í KA-heimilinu í dag. Fyrir leikinn höfðu liðin unnið sinn leikinn hvort og KA getur tryggt sér Íslandsmeistaratitilinn með því að vinna fjórða leik liðanna í Laugardalshöll á sunnudaginn.

Það voru reyndar Þróttarar sem byrjuðu betur og leiddu lengst af í fyrstu hrinu. KA-menn voru þó sterkari í lokin og unnu hrinuna 25:21. Næsta hrina var hnífjöfn allan tímann og liðin skiptust á um að vera yfir. En eins og í fyrstu hrinunni var það góður endasprettur KA sem gerði gæfumuninn og hrinan endaði 25:22 KA í vil.

Þriðja hrinan var síðan í raun einstefna KA-manna og þeir unnu auðveldan 25:16 sigur og leikinn þar með 3:0. Vinni KA fjórða leik liðanna í Laugardalshöllinni á sunnudaginn verður liðið Íslandsmeistari en vinni Þróttur verður úrslitaviðureignin um titilinn háð í KA-heimilinu næstkomandi miðvikudagskvöld.