Fréttir

Bílum hleypt yfir brúna nokkrum sinnum á dag

Snæfríður Ingadóttir - snaefridur@akureyri.net 24.05.2026 kl. 12:15

Upplýsingaskilti með leiðbeiningum verða sett upp við brúna yfir Jökulsá á Fjöllum vegna lokana í tengslum við viðhald á brúnni í sumar. Vegagerðin hvetur vegfarendur til að sýna þolinmæði, fylgja merkingum og virða fyrirmæli á svæðinu. Mynd: Vegagerðin

Í þrjár vikur á tímabilinu 26. maí til 16. júní verður viðhaldsvinna í gangi á brúnni yfir Jökulsá á Fjöllum við Grímsstaði. Vegna þessa þarf að loka fyrir umferð yfir brúna. Aðeins er hægt að keyra yfir brúna á ákveðnum tímum fjórum sinnum á dag, sem og utan vinnutíma.

Samkvæmt upplýsingum á heimasíðu Vegagerðarinnar verður unnið að viðhaldi á brúnni alla virka daga frá klukkan 8 á morgnana til klukkan 19 á kvöldin. Utan þess tíma verður brúin opin fyrir umferð en ætli fólk sér yfir að degi til þarf það að nýta sér opnunartímana sem eru þrisvar sinnum í hálftíma í senn og einu sinni í klukkutíma.

Opnunartímarnir eru þessir:

09:45 – 10:15
12:00 – 13:00
14:45 – 15:15
16:45 – 17:15

Til stendur að mála brúna á þessu tímabili, það er að segja ef veður leyfir. Sá fyrirvari er gerður að ef ekki viðrar til málningarvinnu mun verkefnið frestast lengra inn í sumarið. Lokanir ættu ekki að hafa mikil áhrif á neyðarflutninga þar sem unnt verður að opna fyrir umferð um brúna með skömmum fyrirvara ef aðstæður krefjast.

Til baka í fréttayfirlit