Fréttir
Sláttur hafinn á tveimur bæjum
07.06.2023 kl. 09:35
Baldur Helgi Benjamínsson, bóndi á Ytri-Tjörnum, við slátt í gær. Myndina tók faðir hans, Benjamín Baldursson.
Sláttur er hafinn á tveimur bæjum í Eyjafirðarsveit, Ytri-Tjörnum og Espihóli.
Tíð hefur verið bændum hagstæð í vor. Baldur Helgi Benjamínsson, bóndi á Ytri-Tjörnum, segir við Morgunblaðið í dag að vel líti út með grassprettu. Á hann von á því að tún verði það vel sprottin að sláttur geti hafist af fullum krafti í byrjun næstu viku.
Bændurnir á Ytri-Tjörnum, Baldur Helgi og áður Benjamín Baldursson, faðir hans, hafa oft verið með fyrstu bændum til að hefja slátt, segir í blaðinu. Met þeirra er 30. maí 2003. „Undanfarin ár hafa þeir verið að hefja slátt um þetta leyti. Baldur sló fyrsta túnið í gær og er það með fyrra fallinu.“ Í blaðinu segir að túnið sé nokkrir hektarar að stærð. Það sé gamalt háliðagrastún sem verði að slá snemma því orkugildið falli hratt ef grasið fer að spretta úr sér.