Aukin þjónusta við ungt fólk sem þarf stuðning

Akureyrarbær og Bergið Headspace hafa gert með sér samstarfssamning sem felur í sér aukna þjónustu við ungt fólk sem þarf stuðning og ráðgjöf, þróun á geðheilbrigðisþjónustu við ungt fólk, þjónustu sem byggir á snemmtækri íhlutun.

Greint er frá samninginum á vef bæjarins. „Ríkur vilji er til að taka höndum saman og mæta óskum ungs fólks á svæðinu um þjónustu á svæðinu,“ segir þar.

„Á stórþingi barna á Akureyri kom fram skýr vilji barna og ungmenna um að efla geðheilbrigðisþjónustu við börn og ungmenni. Það kom einnig fram að mikilvægt væri að börn og ungmenni gætu milliliðalaust sóst eftir aðstoð frá fagfólki. Það er því mikið fagnaðarefni að geta nú sagt að slík þjónusta sé í boði,“ segir á vef sveitarfélagsins.

Bergið Headspace á Akureyri verður opið einu sinni í viku auk þess sem alltaf er hægt að óska eftir ráðgjöf í gegnum netspjall, hringja eða senda tölvupóst. Bergið Headspace á Akureyri verður í samvinnu við starfsfólk forvarna- og frístundadeild Akureyrar sem m.a. starfar við Virkið og mun Bergið Headspace Akureyri deila húsnæði með Virkinu í Íþróttahöllinni við Skólastíg.