Fara í efni
Fréttir

Arnór Þór verður einn þjálfara Bergischer

Arnór Þór Gunnarsson, landsliðsmaður í handknattleik og leikmaður þýska 1. deildarliðsins Bergsicher HC, fer í nýtt hlutverk hjá félaginu þegar hann hættir að spila sumarið 2023. Handboltavefur Íslands, handbolti.is, greindi frá þessu í dag og vitnaði í tilkynningu frá félaginu.

Nokkur uppstokkun stendur fyrir dyrum í kjölfar þess að Sebastian Hinze, þjálfari liðsins undanfarin níu ár hverfur frá störfum á næsta sumri og tekur við þjálfun Rhein-Neckar Löwen.

„Ég spila á næsta tímabili, 2022/2023, en planið er að ég komi inn í þjálfarateymið eftir það,“ sagði Arnór Þór í skilaboðum til handbolta.is fyrr í dag. Arnór Þór, sem steig fyrstu handboltaskrefin með Þór en hefur einnig leikið með Val hér heima, hefur verið í herbúðum Bergischer frá sumrinu 2012. Enginn núverandi leikmanna hefur verið svo lengi hjá liðinu.