Andlát: Jón Ingi Cæsarsson
Jón Ingi Cæsarsson, fyrsti formaður Samfylkingarinnar á Akureyri og fyrrverandi formaður Póstmannafélags Íslands, er látinn, 72 ára að aldri. Jón Ingi fæddist í Reykjavík 13. desember 1952 og lést á hjartadeild Landspítalans 7. júní síðastliðinn.
Foreldrar Jóns Inga hans voru Þórdís Eiríksdóttir og Kristvin Kristinsson en hann var ættleiddur af hjónunum Huldu Ragnarsdóttur og Cæsari Hallgrímssyni, sem komu með hann til Akureyrar sex daga gamlan. Ólst Jón Ingi upp á Eyrinni og bjó þar nánast alla tíð.
Jón Ingi gekk í Oddeyrarskóla og Gagnfræðaskóla Akureyrar og fór síðar í Póst- og símaskólann. Hann vann allan starfsferilinn hjá Pósti og síma, síðar Íslandspósti og Póstinum. Jón Ingi sat lengi í stjórn Póstmannafélags Íslands, fyrst 1984-1986, aftur 2000-2009 og árið 2017 var hann kjörinn formaður félagsins. Gegndi Jón Ingi því embætti til 2023.
Jón Ingi starfaði lengi að bæjarmálum á Akureyri fyrir Alþýðuflokkinn og síðan Samfylkinguna. Hann var kjörinn fyrsti formaður Samfylkingarinnar á Akureyri við stofnun flokksins árið 2001 og átti einnig sæti í flokksstjórn. Jón Ingi var varabæjarfulltrúi um tíma, var formaður skipulagsnefndar og umhverfisráðs, sat einnig í skólanefnd og í nefnd um svæðisskipulag Eyjafjarðar.
Jón Ingi var virkur í þjóðfélagsumræðu til margra ára, Akureyri.net hefur til dæmis birt fjölda greina hans síðustu misseri, einkum um skipulags- og umhverfismál, þá síðustu fyrir fáeinum vikum.
Eftirlifandi eiginkona Jóns Inga er Guðrún Gunnarsdóttir. Synir þeirra eru Atli Viðar, f. 1987, og Bjarki Freyr, f. 1992. Dóttir Jóns Inga og Margrétar Pálu Ólafsdóttur er Brynja, f. 1975. Barnabörnin eru níu og langafabörnin þrjú.