Arctic Open, drift, vegasalt og bílalimbó
Íþróttir dagsins eru aðallega stundaðar með kylfu og kúlu annars vegar og bifreiðum hins vegar. Arctic Open miðnæturgolfmótið verður sett á Jaðarsvelli í dag. Á svipuðum tíma hefst keppni í drift á svæði Bílaklúbbsins, en í kvöld er komið að vegasalti og bílalimbói.
Arctic Open fer af stað
Hið árlega alþjóðlega golfmót Arctic Open hefst í dag og stendur fram á laugardag. Þar er keppt í opnum flokki, með og án forgjafar, en mótið er þekkt og vinsælt fyrir miðnæturgolf. Spilaðar eru 18 holur hvorn keppnisdag, 18. og 19. júní, en mótinu lýkur með lokahófi á laugardag. Mótið hefur verið haldið árlega frá árinu 1986, fyrstu 16 árin aðeins í karlaflokki, en í kvennaflokki einnig frá 2002. Upplýsingar um mótið má finna á mótssíðunni á vef Golfklúbbs Akureyrar.
- Fimmtudagur 18. júní
Opnunarhátið, setning Arctic Open kl. 10:30
Fyrsti rástími kl. 11
Þrjár keppnisgreinar á Bíladögum
Bíladagar Bílaklúbbs Akureyrar hófust í gær með bílasýningu, en í dag er komið að keppni í drift og svo vegasalti og bílalimbói í kvöld.
- Fimmtudagur 18. júní
Driftkeppni kl. 10-17
Vegasalt kl. 20
Bílalimbó kl. 21
Dagskrá og upplýsingar um Bíladaga má finna á vef Bílaklúbbs Akureyrar og Facebook-síðu Bíladaga.
Siðareglur Bíladaga:
- Við göngum og keyrum vel um bæinn okkar, jafnt gestir sem heimamenn.
- Virðum hámarkshraða í íbúðarhverfum sem og á vegum úti.
- Við spólum einungis á akstursíþróttasvæði Bílaklúbbs Akureyrar.
- Gestir Bíladaga eru jákvæðir og þar af leiðandi þrælskemmtilegir.
- Við berum virðingu fyrir náunganum og gerum Bíladaga frábæra.
- Gestir Bíladaga ganga snyrtilega um umhverfi sitt.
