Stórstreymt í kvöld og óhagstæð vindátt

Talið er mögulegt að sambærilegar aðstæður skapist í kvöld og í september 2022 þegar sjór flæddi yfir hluta Oddeyrar og olli þar miklu tjóni. Veðurspá er slæm fyrir kvöldið og fram á nótt og neyðarstjórn Norðurorku hefur því verið í viðbragðsstöðu í dag og gær, að því er fram kemur á vef fyrirtækisins. Spáð er hárri sjávarstöðu rétt eftir miðnætti og óhagstæðri vindátt og starfsfólk Norðurorku „fylgist grannt með aðstæðum fram eftir kvöldi og fram yfir miðnætti,“ segir á vef fyrirtækisins.

„Hlutverk Norðurorku í kvöld, líkt og alla aðra daga ársins, er fyrst og fremst að tryggja að fráveitan sinni sínu hlutverki eins vel og mögulegt er. Það er talið nokkuð öruggt að fráveitan muni ekki hafa undan ef sjór gengur á land líkt og gerðist haustið 2022, þar sem fráveitukerfið er ekki hannað fyrir slíkar aðstæður,“ segir á vef Norðurorku. 

„Sem fyrr segir hvetur Norðurorka alla Akureyringa til að huga vel að niðurföllum og þá eru fasteignaeigendur á Eyrinni sérstaklega hvattir til að gera viðeigandi ráðstafanir vegna veðursins.“