Fjórir leikir í Bestu deildunum næstu daga

Fram undan eru fjórir leikir í Bestu deildum kvenna og karla í knattspyrnu næstu daga. Þór/KA tekur á móti Stjörnunni á miðvikudag og sækir ÍBV heim á sunnudag. Þór sækir Víking heim á föstudag og KA tekur á móti ÍBV á sunnudag.

MIÐVIKUDAGUR 6. MAÍ - fótbolti

Leikjadagskráin í Bestu deild kvenna í knattspyrnu er þétt fyrstu vikurnar. Á miðvikudag er komið að þriðja leik Þórs/KA og öðrum heimaleiknum þegar lið Stjörnunnar úr Garðabæ kemur norður.

Þór/KA er með eitt stig í næstneðsta sæti deildarinnar. Liðið gerði jafntefli við FH í fyrstu umferðinni, en tapaði fyrir Grindavík/Njarðvík á útivelli í annarri umferð þar sem gestgjafarnir skoruðu í viðbótartíma leiksins og má segja að þær hafi stolið sigrinum eftir að fjölmörg færi Þórs/KA fóru í súginn. Stjarnan er í 4. sætinu með þrjú stig, tapaði fyrir Víkingi í fyrstu umferðinni, en vann Val í annarri umferð.

• Besta deild kvenna í knattspyrnu
  Þórsvöllur (VÍS-völlurinn - gervigras á Ásnum) kl. 17
  Þór/KA - Stjarnan

Þór/KA vann fyrri viðureign liðanna í Bestu deildinni í fyrra 1-0 á heimavelli í maí, en Stjarnan vann seinni leikinn 4-1 í byrjun september. 

FÖSTUDAGUR 8. MAÍ - fótbolti

Sjötta umferð Bestu deildar karla í knattspyrnu er á dagskrá um komandi helgi, fimm leikir á föstudag og einn á sunnudag. Þór sækir Íslandsmeistara Víkings heim í Fossvoginn.

• Besta deild karla í knattspyrnu
  Víkingsvöllur kl. 17:30
  Víkingur - Þór

Bæði lið léku um liðna helgi, Þór gegn KA á laugardag og Víkingar í Keflavík á sunnudag. Þórsarar máttu þola 0-1 tap á heimavelli, en Víkingur vann Keflavík á útivelli, 3-1. 

Þór er í 7. sæti deildarinnar að loknum fimm umferðum með sex stig, tvo sigra og þrjú töp. Víkingur er í 2. sætinu, á eftir KR, með 13 stig eftir fjóra sigra og eitt jafntefli.

SUNNUDAGUR 10. MAÍ - fótbolti

Þór/KA klárar tvö lengstu ferðalögin í fyrstu tveimur útileikjum sínum í deildinni, fyrst til Njarðvíkur og á sunnudag er komið að leik í Vestmannaeyjum. Ferðalög til og frá Eyjum, bæði fyrir gestalið og Eyjaliðin þegar þau leika útileiki, hafa verið í fréttunum undanfarið enda staðan ekki alveg eins og best verður á kosið þessar vikurnar.

ÍBV hóf keppni í Bestu deildinni með tveimur sigrum eftir tveggja ára fjarveru úr efstu deild, fyrst með 4-3 sigri á Fram á útivelli og síðan 3-2 sigri á Víkingi á heimavelli. Þór/KA náði sér hins vegar í eitt stig í fyrstu tveimur leikjunum og þarf á stigum að halda í Eyjum.

• Besta deild kvenna í knattspyrnu
  Hásteinsvöllur í Vestmannaeyjum kl. 14
  ÍBV - Þór/KA

- - -

Sama dag og Þór/KA leikur gegn ÍBV í Eyjum tekur KA á móti ÍBV á Akureyri í Bestu deild karla. Þessi lið mættust þrisvar í Bestu deildinni í fyrrasumar. Markalaust jafntefli varð niðurstaðan í Eyjum í maí, en KA vann 1-0 á Akureyri í ágúst. Liðin mættust síðan í lokaumferðinni í lok október í neðri hluta deildarinnar í Eyjum og vann KA þann leik 4-3.  

• Besta deild karla í knattspyrnu
  KA-völlur (Greifavöllurinn sunnan við KA-heimilið - gervigras) kl. 17
  KA - ÍBV

Bæði lið byrjuðu illa, náðu sér í eitt stig í fyrstu fjórum leikjunum. KA gerði jafntefli við ÍA í fyrstu umferðinni og ÍBV við FH í þeirri fjórðu. KA færði sig svo upp töfluna með sigri á Þór í fimmtu umferðinni, er með fjögur stig í 9. sæti deildarinnar, en ÍBV er áfram í botnsæti deildarinnar eftir 1-2 tap í fyrir Breiðabliki á heimavelli í fimmtu umferðinni.