Þór
Verðlaunahátíð Þórs haldin í dag, 6. janúar
06.01.2026 kl. 10:00
Íþróttafólk Þórs árið 2024 sem heiðrað var á þrettándanum í fyrra: Rafíþróttamaðurinn Alfreð Leó Svansson og Sandra María Jessen, landsliðskona í knattspyrnu. Mynd: Þorgeir Baldursson
Venju samkvæmt er verðlaunahátíð Íþróttafélagsins Þórs haldin í upphafi árs, þar sem m.a. kjöri íþróttafólks félagsins verður lýst og afreksfólk heiðrað. Samkoman er í félagsheimilinu Hamri og hefst kl. 17 í dag, þriðjudaginn 6. janúar.
Eftir því sem fram kemur á vefsíðu Þórs verður dagskráin með hefðbundndu sniði. Íslandsmeistarar og landsliðsfólk félagsins verður heiðrað, íþróttafólk hverrar deildar kynnt og heiðrað og kjöri lýst á íþróttafólki Þórs. Þá verður látinna félaga minnst og ýmis önnur ávörp flutt.
Inn á milli atriða verður tónlistarflutningur og boðið verður upp á léttar veitingar. Félagið hvetur Íslandsmeistara og landsliðsfólk til að mæta á athöfnina, sem og alla iðkendur, félagsfólk og velunnara.
