Sé flugi aflýst eiga farþegar ýmsa kosti

Þegar flugferðum er aflýst eiga farþegar sem höfðu bókað sæti ríkari réttindi til úrlausnar heldur en þegar flugi seinkar. Til dæmis geta þeir krafist þess að flugfélagið komi þeim á ákvörðunarstað eftir öðrum leiðum. Þeir farþegar sem áttu bókað með flugi Niceair til Kaupmannahafnar í febrúar, sem nú hefur verið aflýst, eiga rétt á að Niceair komi þeim þangað að kostnaðarlausu eftir öðrum leiðum – kjósi þeir svo.

Samkvæmt evrópskri reglugerð er réttur flugfarþega tryggður þegar röskun verður á flugi. Breki Karlsson, formaður Neytendasamtakanna, segir við akureyri.net að við aflýsingu flugferða tryggi reglugerðin farþegum val um þrenns konar úrbætur:

• Að fá endurgreitt að fullu innan sjö daga
• Að fá annað flug við fyrsta tækifæri til lokaákvörðunarstaðar (jafnvel með öðru flugfélagi)
• Að fá annað flug síðarmeir til lokaákvörðunarstaðar (jafnvel með öðru flugfélagi)

Niceair hefur gefið það út að þeir farþegar sem bókað höfðu flug með félaginu muni fá fulla endurgreiðslu, auk 25% ferðainneignar fyrir flug í framtíðinni. Eins og fram kemur hér að framan er farþegum ekki skylt að þiggja endurgreiðslu fargjaldsins, heldur geta þeir farið fram á að láta Niceair útvega sér annað far í stað þess sem aflýst var.

Nánar má fræðast um réttindi flugfarþega þegar röskun verður á flugi á vef Neytendasamtakanna.