Sandra sú fjórða sem spilar 250 deildaleiki

Landsliðskonan Sandra María Jessen er fjórða fótboltakonan frá Akureyri sem nær að spila 250 deildaleiki á sínum meistaraflokksferli.

Þeim áfanga náði hún í leik með Köln gegn Hamburger SV í desember og skoraði þá einmitt þrennu í leiknum eins og Akureyri.net fjallaði um á þeim tíma.

Leikirnir hennar eru því orðnir 256 í dag, eftir leik gegn Leverkusen í gærkvöld sem Kölnarliðið tapaði naumlega, 2-1. Sandra, sem er nýbúin að framlengja samning sinn við Köln til ársins 2028, var að vanda í byrjunarliðinu en hún hefur verið þar í öllum átján leikjum tímabilsins og er í hópi markahæstu leikmanna deildarinnar með níu mörk.

Þær þrjár akureyrsku konur sem eiga fleiri deildaleiki að baki en Sandra eru Arna Sif Ásgrímsdóttir (302), Laufey Björnsdóttir (283) og Rakel Hönnudóttir (262). Arna Sif er sú tólfta leikjahæsta af öllum íslenskum knattspyrnukonum og leikur á ný með Þór/KA í ár, Laufey lék með Fylki á síðasta ári en Rakel er búin að leggja skóna á hilluna.

Sandra hefur leikið stærstan hluta ferilsins með Þór/KA, spilað 190 deildaleiki með liðinu, alla í efstu deild, og skorað í þeim 121 mark, en hún var Íslandsmeistari með liðinu 2012 og 2017, í bæði skiptin sem Akureyrarliðið hefur hampað þeim eftirsótta titli.

Hún er nú komin með 60 leiki í efstu deild Þýskalands, með Leverkusen og Köln, og þar hefur hún skorað 10 mörk. Sandra er fjórði leikjahæsti Íslendingurinn í þýsku deildinni, á eftir Glódísi Perlu Viggósdóttur, Söru Björk Gunnarsdóttur og Karólínu Leu Vilhjálmsdóttur.

Sandra lék einnig sex leiki með Slavia Prag í efstu deild Tékklands snemma árs 2018 og skoraði þar tvö mörk.

Þessi naumi ósigur Kölnar gegn Leverkusen var afdrifaríkur því Köln missti af tækifæri til að fara upp fyrir mótherja sína og í fimmta sæti deildarinnar en með því hefðu Sandra og samherjar hennar blandað sér af alvöru í baráttuna um Evrópusæti.

Leverkusen klifraði upp í þriðja sætið með sigrinum en Köln er í áttunda sæti af fjórtán liðum þegar liðið hefur leikið 18 af 26 leikjum sínum á þessu tímabili.

* Fréttin hefur verið uppfærð en í upphaflegu útgáfuna af henni vantaði leikina með Slavia Prag.

Lista yfir leikjahæstu konur Íslands í deildakeppni má sjá í bókinni Íslensk knattspyrna 2025.