Emma og Nile öflugar í sigri Þórs á KV

Þór vann KV með 20 stiga mun, 90-70, í þriðju umferð 1. deildar kvenna í körfubolta þegar liðin mættust í Íþróttahöllinni á Akureyri í gær. Tveimur stigum munaði eftir fyrri hálfleikinn, en frábærir kaflar í seinni hálfleiknum skiluðu Þórsliðinu öruggum sigri. Emma Karólína Snæbjarnardóttir og Nile Miller voru öflugar í Þórsliðinu, Emma með 37 stig, en Nile tók 16 fráköst og stal 13 boltum.

Leikurinn var nokkuð jafn í upphafi, en Þór náði tíu stiga forskoti á lokamínútum fyrsta leikhlutans. Annar leikhluti byrjaði afleitlega og náðu gestirnir forystunni með 15-2 áhlaupi í fyrri hluta hans. Ekkert gekk upp hjá Þórsliðinu á þessum kafla, skotin rötuðu ekki niður og annað eftir því. Tíu stiga forskotið úr fyrsta leikhlutanum hvarf og KV með þriggja stiga forskot, 29-32, þegar Þórsliðið náði vopnum sínum að nýju. Tveimur stigum munaði að loknum fyrri hálfleiknum, 41-39, Þór í vil.

Skildu slæma kaflann eftir

Frábær seinni hálfleikur skilaði hins vegar góðri forystu og öruggum sigri þegar upp var staðið. Þórsliðið seig hægt og bítandi fram úr í þriðja leikhlutanum, náði góðum tökum á leiknum og 17 stiga forskoti. Áhlaup eins og í öðrum leikhlutanum var hins vegar ekki í kortunum hjá KV heldur voru það Þórsarar sem keyrðu yfir gestina í upphafi fjórða leikhlutans. Þór skoraði ellefu fyrstu stigin í fjórða leikhlutanum, sem var rúmlega hálfnaður þegar KV tókst að skora sín fyrstu stig. Þór vann þriðja leikhlutann með 15 stiga mun og náði mest 28 stiga forskoti, 85-57, um miðjan fjórða leikhlutann. Lokatölur 90-70.

Þó svo munurinn hafi á endanum orðið 20 stig verður að hrósa baráttuglöðu liði KV sem samanstóð af átta íslenskum leikmönnum. Þær nýttu þriggja stiga skotin mun betur en Þórsliðið, skoruðu úr 11 slíkum á meðan fimm þriggja stiga skot heppnuðust hjá Þórsliðinu. 

Magnaðar tölur hjá Emmu og Nile

Þegar rýnt er í tölfræðina má finna nokkra áhugaverða punkta:

• Emma Karólína Snæbjarnardóttir fékk 19 vítaskot í leiknum og skoraði úr 16 skotum. Af 37 stigum sem hún skoraði í leiknum voru því 21 úr opnum leik, en 16 af vítalínunni.
• Sextán sinnum fengu leikmenn KV villu fyrir brot á Emmu Karólínu. 
• Nile Miller var með þrefalda tvennu í stigum, fráköstum og stolnum boltum! Hún skoraði 12 stig, tók 16 fráköst og stal 13 boltum.
• Nile Miller var með hæsta framlagið í Þórsliðinu, þó svo Emma Karólína hafi verið langstigahæst. Nile var með 43 framlagspunkta og Emma 41.
• Sú yngsta í Þórsliðinu, Natalía Mist Þráinsdóttir Norðdahl, sem er 16 ára, tók tíu fráköst, auk þess að skora átta stig.
• Fjórar af átta, helmingur leikmanna KV, voru komnar í fjórar villur í leiknum þegar yfir lauk. KV fékk samtals 25 villur í leiknum, en Þór 14.

Þór - KV (27-17) (14-22) 41-39 (33-18) (16-13) 90-70 

Þetta var annar sigur Þórsliðsins í þremur leikjum. Fimm lið eru jöfn með tvo sigra; Breiðablik, Selfoss, Þór Þ., Þór A. og Keflavík-b, en Keflavíkurliðið þó ósigrað, hefur aðeins spilað tvo leiki.

Helstu tölur, stig/fráköst/stoðsendingar:

Þór

Emma Karólína Snæbjarnardóttir 37/9/6, Nile Miller 12/16/5 (13 stolnir boltar), Ksenija Kuzmanovic 11/8/0, Natalía Mist Þráinsdóttir Norðdahl 8/10/2, Sigurlaug Eva Jónasdóttir 6/1/0, Hrefna Ottósdóttir 6/0/0, Kristný Halla Bragadóttir 4/0/0, Karen Lind Helgadóttir 3/2/1, Vaka Bergrún Jónsdóttir 3/1/1,  María Sól Helgadóttir 0/1/1.

KV

Elfa Falsdóttir 21/4/2, Ingunn Erla Bjarnadóttir 17/5/5, Klara Líf Pálsdóttir 15/8/3, Kristrún Edda Kjartansdóttir 8/5/4, Anna Lóa Óskarsdóttir 6/5/0, Telma Lind Bjarkadóttir 2/6/2, Katrín Huld Káradóttir 1/5/0, Jannika Jónsdóttir 0/4/1.

Leikskýrslan og tölfræði

Staðan í deildinni

Næst:

• Laugardagur 24. október
  1. deild kvenna, 4. umferð
  Skógarsel í Breiðholti kl. 18
  ÍR - Þór