Hvað gera stelpurnar gegn FH í Hafnarfirði?

Kvennalið Þórs/KA freistar þess að komast aftur á sigurbraut í dag þegar það sækir FH heim í Bestu deildinni, efstu deild Íslandsmótsins.

Þór/KA hefur tapað tveimur fyrstu leikjunum að loknu mánaðarlöngu EM-hléi, fyrir Tindastóli og Val, en þrátt fyrir það er liðið enn í 4. sæti Bestu deildarinnar með 18 stig úr 12 leikjum. Valur náði að komast upp að hlið Akureyrarliðsins með sigri í Boganum í síðustu umferð, en hefur lokið 13 leikjum, auk þess sem Þór/KA hefur betri markatölu.

• Besta deild kvenna í knattspyrnu, 13. umferð
  Kaplakrikavöllur í Hafnarfirði kl. 18
  FH - Þór/KA

Þór/KA og FH hafa mæst tvisvar í Boganum í sumar og Hafnarfjarðarliðið haft betur í bæði skiptin. Fyrst vann FH 3:0 í Bestu deildinni snemma í maí og síðan 3:1 í átta liða úrslitum bikarkeppninnar um miðjan júní. Bikarúrslitaleikurinn er á dagskrá á laugardaginn kemur og þar verða FH-stelpurnar á ferðinni; þær sigruðu Val í undanúrslitum og mæta Breiðabliki í úrslitunum á Laugardalsvelli.