Þórsarar taka á móti botnliði Leiknismanna
Þórsarar taka á móti Leiknismönnum í dag í Lengjudeildinni, næst efstu deild Íslandsmótsins í knattspyrnu. Leikurinn verður í Boganum og hefst kl. 16.
Þór mátti þola 2:1 tap í síðustu umferð þegar lið Þróttar kom norður og gerði tvö mörk á lokamínútu leiksins. Þróttarar fóru þar með upp fyrir Þórsara í töflunni. Leiknir tapaði heimaleik gegn Fjölni og færðist niður í fallsæti.
- Lengjudeild karla í knattspyrnu
Boginn kl. 16
Þór - Leiknir
Þróttur vann Keflavík 3:2 í gærkvöldi og HK sigraði ÍR 2:1. ÍR er þó enn efst með 25 stig, HK er í öðru sæti með 24, Njarðvík sem leikur gegn Völsungi á Húsavík í dag er með 23, Þróttur fór í 21 stig með sigrinum í gær, Keflavík hefur 18 stig og Þór er með 17 stig í sjötta sæti. Með sigri í dag færu Þórsarar upp í fimmta sæti.
Lið Leiknis og Fjölnis eru neðst í deildinni með níu stig.
