KA tekur á móti Ægi í Mjólkurbikarnum

Mjólkurbikarkeppni karla og kvenna í knattspyrnu er allsráðandi þessa vikuna. Tvö Akureyrarlið verða í eldlínunni og verða það karlarnir hjá KA sem ríða á vaðið. 

Sextán liða úrslit í Mjólkurbikarkeppni karla í knattspyrnu hófust í gær, en KA á leik í dag. KA fékk heimaleik í 16 liða úrslitunum, og má segja að lukkan hafi verið með í drættinum því andstæðingarnir, Ægir úr Þorlákshöfn, sem unnu 2. deildina í fyrrahaust, sitja nú í botnsæti Lengjudeildarinnar að loknum þremur umferðum. En í bikarkeppni geta auðvitað orðið til alls konar ævintýri, eins og bæði liðin þekkja.

• Mjólkurbikarkeppni karla í knattspyrnu
  16 liða úrslit
  KA-völlur (Greifavöllurinn sunnan við KA-heimilið – gervigras), kl. 14
  KA - Ægir

KA féll úr bikarkeppninni með 2-4 tapi fyrir Fram í 16 liða úrslitunum í fyrra. Ægismenn eru hins vegar komnir mun lengra í keppninni núna en í fyrra, þegar þeir féllu úr keppni með 2-3 tapi fyrir KV í fyrstu umferð forkeppninnar. Ægir nær að minnsta kosti þremur bikarleikjum í ár því liðið sigraði Reyni úr Sandgerði í annarri umferð forkeppninnar, 2-0 í lok mars, og vann síðan 7-1 útisigur á Árbæ í 32 liða úrslitunum í byrjun apríl. KA vann sömuleiðis stórsigur í 32 liða úrslitum, sigraði Hött á Egilsstöðum 5-0.