Tveir frá GA í piltalandsliðinu í golfi
![](/static/news/lg/1687790106_gagolf-afrekssamningar.jpg)
Golfklúbbur Akureyrar á tvo fulltrúa í piltalandsliði Íslands sem keppir á Evrópumótinu í liðakeppni í næsta mánuði.
Skúli Gunnar Ágústsson og Veigar Heiðarsson eru fulltrúar Akureyringa í sex manna hópi sem valinn hefur verið til að taka þátt í Evrópumótinu í liðakeppni sem fram fer á Green Resort Hrubá Borša-vellinum í Slóvakíu dagana 12.-15. júlí. Piltalandsliðið er í næstefstu deild. Þjálfarar piltalandsliðsins eru Birgir Leifur Hafþórsson og Þorsteinn Hallgrímsson. Þrjú efstu liðin tryggja sér sæti í efstu deild, ásamt Íslandi eru Eistland, Grikkland, Ísland, Lettland, Lúxemborg, Portúgal, Pólland, Skotland, Tyrkland og Wales í næstefstu deild.
Þeir Skúli Gunnar og Veigar eru báðir hluti af GA golfxtra-hópnum og fengu á dögunum afrekssamning hjá Golfklúbbi Akureyrar, eins og sagt var frá í frétt hér á Akureyri.net.