Golf

Skíðað og skautað – KA/Þór á útivelli

Haraldur Ingólfsson - haraldur@akureyri.net 28.03.2026 kl. 06:00

Bergrós Ásta Guðmundsdóttir og Sonja Lí Kristinsdóttir verða í eldlínunni í dag, önnur í Hafnarfirði og hin í Hlíðarfjalli. Vormót Skautasambandsins er á dagskrá í Skautahöllinni.

Skíðamóti Íslands verður fram haldið í dag í Hlíðarfjalli þegar keppt verður í stórsvigi. Fyrsta umferð úrslitakeppni Olísdeildar kvenna í handbolta hefst í dag.

Keppt í stórsvigi á Skíðamóti Íslands

Skíðamót Íslands í alpagreinum stendur nú yfir í Hlíðarfjalli, en keppt er í göngu í Ólafsfirði.

Dagskráin í Hlíðarfjalli í dag:

10:00 – Stórsvig, fyrri ferð
11:45 – Stórsvig, seinni ferð

Verðlaunaafhending verður að móti loknu við Strýtuskála

Dagskráin í Ólafsfirði í dag, skíðaganga með hefðbundinni aðferð, hópstart:

11:00 – 15–16 ára (5 km)
11:30 – 13–14 ára (3,5 km)
12:00 – Karlar 17+ (15 km)
12:05 – Konur 17+ (15 km)

Verðlaunahóf í Tjarnarborg kl. 15:30.

Úrslitakeppni Olísdeildar kvenna að hefjast

Liðin sem enduðu í 3.-6. sæti Olísdeildar kvenna í handbolta hefja leik, en tvö efstu liðin í deildinni, Valur og ÍBV, bíða þar til í undanúrslitum. Þau eiga reyndar eftir að mætast í lokaumferð deildarinnar og verður sá leikur einnig í dag. Hann skiptir þó engu máli um röð liðanna því Valur er deildarmeistari og ÍBV endaði í 2. sæti.

Olísdeild kvenna í handbolta
Úrslitakeppni, 1. umferð, leikur 1
Ásvellir í Hafnarfirði kl. 17:30
Haukar - KA/Þór
Útsending: Handboltapassinn í Sjónvarpi Símans
Áskriftarsjónvarp

KA/Þór endaði í 6. sæti deildarkeppninnar og mætir Haukum, sem enduðu í 3. sætinu. Haukar unnu allar þrjár viðureignir þessara liða í deildinni í vetur, tvær þeirra með meira en tíu marka mun. Fyrsti leikurinn var á Akureyri í október og endaði 23-27. Haukar unnu svo 35-20 í Hafnarfirði í desember og þriðji leikurinn endaði 20-31 á Akureyri í febrúar.

Vormót ÍSS í Skautahöllinni

Vormót Skautasambands Íslands fer fram í Skautahöllinni á Akureyri í dag og á morgun. Dagskrá dagsins má sjá á myndinni hér að neðan.