Nota ferðakaleik Nonna við messu á morgun

Messað verður í Minjasafnskirkjunni á morgun – á fyrsta sunnudegi í aðventu. Messan hefst klukkan 11.00, prestur verður sr. Aðalsteinn Þorvaldsson en Haraldur Þór Egilsson, safnstjóri, bregður sér í hlutverk meðhjálpara. Um leik á sögulegt hljóðfæri Minjasafnskirkjunnar sér organistinn Eyþór Ingi Jónsson en félagar úr Kór Akureyrarkirkju sjá um fagran söng.

Í messunni verður gengið til altaris og ástæða er til að vekja athygli á því að við þá athöfn verður notaður ferðakaleikur og patína sem voru í eigu pater Jóns Sveinssonar, Nonna.

• Kaleikur er drykkjarkerið, bikarinn, sem fólk bergir af þegar gengið er til altaris. Patína er diskurinn undir oblátur, altarisbrauðið.

Jón Sveinsson, Nonni, var fyrstur Íslendinga til að taka vígslu sem kaþólskur prestur eftir siðaskiptin. Kaleikinn notaði hann á ferðum sínum um heiminn og ekki er ólíklegt að Nonni hafi notað gripinn þegar hann var að störfum á vígstöðvum fyrri heimstyrjaldar.