Bílastæðum fjölgað um 27 við Sunnuhlíð?

Eigandi verslanakjarnans Sunnuhlíðar í Glerárhverfi hefur óskað eftir því að skipulagi lóðar verði breytt í þeim tilgangi að hægt verði að fjölga bílastæðum um 27. Óskin er ekki síst sett fram vegna starfsemi Heilbrigðisstofnunar Norðurlands; heilsugæslustöð bæjarins flutti í húsið (Sunnuhlíð 12) snemma árs 2024 og strax þá var ljóst að bílastæði yrðu af skornum skammti.

Skipulagsráð Akureyrar tók í gær fyrir tillögu fasteignafélagsins Heima, eiganda húsnæðisins, og samþykkti að leggja til við bæjarstjórn að tillaga að breytingu á deiliskipulagi sem fæli í sér stækkun bílstæðis yrði auglýst. Hugmyndin er að ný stæði verði norðan við annað af núverandi bílastæðum, á grassvæði við hlið lítils leikvallar austan við húsið, á milli Sunnuhlíðar 12 og svæðis íþróttafélagsins Þórs.

Enn frekari stækkun?

„Útfæra þarf tillögu að breytingu í samráði við skipulagssvið og umhverfis- og mannvirkjasvið,“ segir í fundargerð skipulagsráðs og ráðið fól skipulagsfulltrúa jafnframt að skoða í samvinnu við umhverfis- og mannvirkjasvið enn frekari stækkun á bílastæði norðaustan við húsið og færslu á leikvelli.

Lausleg talning leiddi í ljós að nú er 91 bílastæði við verslanakjarnann, 42 norðvestan við húsið, við innganginn að heilsugæslustöðinni og 48 sunnan og suðaustan við húsið.