Dekurdagar færðu KAON 7,7 milljónir
Á dögunum fékk Krabbameinsfélag Akureyrar og nágrennis (KAON) afhenta styrkupphæð sem safnaðist á hinum árlegu Dekurdögum í október síðastliðnum. Upphæðin sem safnaðist í ár nam 7,7 milljónum króna og hefur aldrei verið hærri.
Í frétt á vefsíðu KAON kemur fram að Dekurdagar hafi verið einn stærsti bakhjarl félagsins undanfarin ár. Framtakið er liður í Bleikum október, sem er vitundarvakning tileinkuð konum sem greinst hafa með krabbamein, og stór hluti af söfnunarfénu er til kominn vegna sölu á handhnýttum bleikum slaufum sem bundnar eru í staura. Frumkvöðlarnir á bak við Dekurdaga eru þær Vilborg Jóhannesdóttir og Inga Vestmann og í ár batt Vilborg hvorki fleiri né færri en 1.500 slaufur. Til viðbótar slaufusölunni safnast peningar með þátttökugjöldum fyrirtækja og almennum styrkjum.
Í fréttinni kemur einnig fram að í ár fengu Dekurdagar aðstoð fá þrennum félagasamtökum; Lionsklúbbnum Sunnu á Dalvík, Lionsklúbbnum Sif í Eyjafjarðarsveit og Lady Circle 22. Eins aðstoðaði Ragnhildur Vestmann við sölu á slaufum á Ólafsfirði og Anna Vala við að hengja upp slaufur.
Styrkurinn kemur sér einstaklega vel í rekstri KAON, sem er alfarið rekið fyrir sjálfsaflafé, þ.e. stuðning frá félagsmönnum, einstaklingum og fyrirtækjum á svæðinu, ásamt rekstrarstyrk og verkefnastyrkjum frá Velunnurum Krabbameinsfélagsins.
