Ari Emin Björk valinn sveigbogamaður ársins

Bogfimisamband Íslands (BFSÍ) valdi Ara Emin Björk úr Íþróttafélaginu Akri sem sveigbogamann ársins 2025. Ari er 20 ára gamall og er þetta í fyrsta sinn sem hann hreppir þennan titil. Þetta kemur fram í frétt frá BFSÍ.

Innan bogfiminnar er keppt með nokkrum mismunandi gerðum boga og eru bogfimimenn og -konur valdar í flokkum trissuboga, berboga og sveigboga. Ari er eini iðkandinn úr Akri í hópi bogfimifólks ársins, allir hinir eru frá BF Boganum í Kópavogi.

Í umsögn um afrek Ara á árinu í fréttinni á vef BFSÍ kemur meðal annars fram að hanni vann alla sex Íslandsmeistaratitla U21 á árinu ásamt því að vinna sinn fyrsta Íslandsmeistaratitil í meistaraflokki. Ari vann einnig silfurverðlaun á öllum öðrum ÍM í meistaraflokki á árinu og tók brons í bæði Bikarmótaröð BFSÍ inni og úti. Í alþjóðlegri keppni á árinu sýndi Ari m.a. flotta niðurstöðu á NM ungmenna þar sem hann endaði í 7. sæti, varð í 33. sæti á fjölmennasta ungmennamóti í sögu íþróttarinnar á Evrópubikarmóti U21 í Búlgaríu og endaði í 17. sæti á EM U21.