50 ár frá fyrsta leik eftir ÍBA-tímann

Í dag eru 50 ár frá fyrsta leik Akureyringa á Íslandsmótinu í knattspyrnu eftir að Þór og KA hófu að leika undir eigin merkjum í kjölfar þess að lið Íþróttabandalags Akureyrar (ÍBA) féll úr efstu deild haustið 1974. Akureyrarfélögin höfðu þá teflt fram sameiginlegu liði á Íslandsmótinu síðan á fimmta áratugnum.

Akureyrarliðin þurftu að byrja „á botninum“ sumarið 1975. Íslandsmótinu var á þessum tíma skipt í þrjár deildir og liðin því skráð til leiks í 3. deild.

Það voru Þórsarar sem riðu á vaðið sumarið 1975. Fyrsti leikurinn fór fram á malarvellinum á Blönduósi, þar sem Þór sigraði lið USAH 1:0 með marki Óskars Gunnarssonar í fyrri hálfleik. Þetta var laugardaginn 7. júní, daginn eftir 60 ára afmæli Þórs. Óskar heitinn var aðeins 17 ára, fagnaði ekki 18 ára afmælinu fyrr en seinna um sumarið.

• Leikmannahópinn má sjá á meðfylgjandi leikskýrslu. Þar má líka sjá að dómari var Guðmundur Búason og línuverðir Hreinn Hrafnsson og Þóroddur Hjaltalín.
• Þeir sem hófu leikinn fyrir Þór voru: Samúel Jóhannsson, Oddur Óskarsson, Sigurður Lárusson, Guðni Jónsson, Gunnar Austfjörð, Pétur Sigurðsson, Árni Gunnarsson, Aðalsteinn Sigurgeirsson (fyrirliði), Jón Lárusson, Einar Sveinbjörnsson og Óskar Gunnarsson.
• Varamenn voru Ragnar Þorvaldsson, Páll Sigurgeirsson, Gunnar Malmquist Gunnarsson, Ómar Friðriksson og Ævar Jónsson.
• Þórsarar gerðu eina breytingu á liðinu í leiknum: hægri bakvörðurinn Oddur Óskarsson fór af velli og í hans stað kom Gunnar Malmquist Gunnarsson.
• Þjálfari Þórs þetta sumar var Steingrímur Björnsson.

• Þórsarar drógust í E-riðil 3. deildar með Ungmennasambandi Austur-Húnvetninga (USAH), Magna frá Grenivík og Ungmennasambandi Eyjafjarðar (UMSE).

Um haustið mættust Akureyrarliðin í úrslitaleik 3. deildar þar sem Þór sigraði 4:0 en bæði fóru upp og léku því í 2. deild sumarið 1976. 

Meira um þetta eftirminnilega knattspyrnusumar síðar