Hvað á að byggja? Hvar á að byggja?

Í aðdraganda væntanlegra sveitarstjórnarkosninga hefur stjórn Viðreisnar á Akureyri átt samtöl við fólk víða úr atvinnulífinu. Eitt af því sem komið hefur berlega í ljós í þeim samtölum er yfirþyrmandi skortur á hentugu skrifstofu- og athafnahúsnæði hér í bænum. Fyrir utan turninn sem góðu heilli hefur verið reistur við Norðurtorg, hefur í raun ekkert sérhannað, nútímalegt skrifstofuhúsnæði verið reist í bænum frá því fyrir aldamót.

Hvar er skrifstofuhúsnæðið fyrir alla þá fjölmörgu sem sitja við tölvur allan daginn og sinna hinum margvíslegustu störfum? Hvar er húsnæðið fyrir hugverk og hugmyndavinnu í víðum skilningi? Hvar er húsnæðið fyrir rannsóknar- og þróunarstofur af öllu tagi? Hvar er húsnæði fyrir tækni- og nýsköpunarfyrirtæki?

Það er alvarlegt ef fyrirtæki finna hvergi húsnæði við hæfi í bænum sem hentar fjölbreytileika atvinnulífsins til framtíðar og unga fólkið okkar vill starfa í. Gleymum því ekki að stærstur hluti unga fólksins okkar fer suður eða erlendis til náms og kynnist þar nútíma vinnuaðstöðu. Ef fyrirtæki hér í bænum geta fátt annað boðið en þreytt, óuppgert húsnæði frá síðustu öld er lítt spennandi fyrir unga fólkið okkar að koma til baka til starfa.

Eitthvað hefur farið úrskeiðis varðandi skipulag bæjarins gagnvart atvinnulífinu. Lóðir og svæði sem henta fyrirtækjum er alger undirstaða þess að atvinnulíf þrífist og dafni og þar með bærinn allur. Það vakti því athygli að á kynningarfundi bæjarins um skipulagsmál, sem haldinn var í Hofi þann 6. nóv sl, að öll áherslan var lögð á íbúðabyggð. Hvergi nokkurs staðar var minnst á lóðir fyrir skrifstofu- og atvinnuhúsnæði.

Förum vel með landsvæði Akureyrar

Akureyri er landlítið sveitarfélag sem knýr okkur til að fara vel með landsvæðið innan þess. Það þýðir ekki að breyta skuli öllu eða byggja alls staðar. Við eigum til dæmis ekki byggja í Lystigarðinum, ekki setja háa turna innan um lágreista byggð og ekki byggja skýjakljúfa í aðflugslínu Akureyrarflugvallar. Jafnframt er mikilvægt að halda í græna ásinn sem gengur þvert í gegnum byggðina, Krossanesborgir, Kotárborgir og Naustaborgir og tryggja þannig öllum Akureyringum greitt aðgengi að ósnortinni náttúru innan bæjarmarkanna. Þetta útilokar ekki að nýta megi betur þau svæði sem annars vegar standa ónýtt í dag sem og hins vegar svæði sem kalla á endurnýjun og nýtt líf.

Í stefnuskrá Viðreisnar er sett fram framtíðarsýn um svokallaða „Áttu“, svæðið sem nær frá Glerártorgi í norðri að Búðargili í suðri. Þar mætast ásar á „horninu á Akureyri“ (Kaupfélagshorninu) og er svæðinu ætlað að mynda grunn að uppbyggingu sem tengir saman atvinnulíf, mannlíf og vistvænt umhverfi.

Brýnt er að taka afstöðu til og skilgreina hvaða svæði og mannvirki eigi að njóta verndar til framtíðar. Aðrar minningar eigum við að varðveita með myndum, sögum og menningarviðburðum. Hér þarf að huga að jafnvægi og gæta þess að Akureyri fái að þróast og þroskast á uppbyggilegan hátt þannig að næstu kynslóðir þurfi ekki að leita framtíðartækifæranna annars staðar.

Unnur Pétursdóttir er sjúkraþjálfari og fv. formaður Félags sjúkraþjálfara, og skipar 7. sæti á framboðslista Viðreisnar á Akureyri fyrir bæjarstjórnarkosningar í maí