Alfreð Gíslason
Ágúst Elí Björgvinsson genginn til liðs við KA
19.12.2025 kl. 20:00
Glaðir í bragði eftir leikinn í kvöld. Frá vinstri: Bruno Bernat markvörður KA, Andri Snær Stefánsson þjálfari og nýi KA-maðurinn, Ágúst Elí Björgvinsson. Mynd: Skapti Hallgrímsson
Markvörðurinn Ágúst Elí Björgvinsson er genginn til liðs við handboltalið KA. Það var tilkynnt eftir að KA vann Íslands- og bikarmeistara Fram á heimavelli í kvöld og tryggði sér sæti í fjögurra liða úrslitum bikarkeppninnar.
Ágúst Elí, sem fylgdist með leiknum í KA-heimilinu, hefur átt sæti í íslenska landsliðshópnum af og til síðustu ár. Hann er þrítugur að aldri og semur við KA í eitt og hálft ár; til vors 2027.
Markvörðurinn hefur leikið erlendis undanfarin átta ár. Hann hóf ferilinn í FH en fór þaðan til Sävehof þar sem hann varð sænskur meistari og hefur einnig leikið með Kolding og Ribe-Esbjerg í Danmörku. Auk þessa var hann á mála hjá meisturum Álaborgar um tíma í haust, sem lánsmaður vegna meiðsla landsliðsmarkvarðarins Niklas Landin, en eftir að hann sneri til baka fékk Ágúst engin tækifæri með Ribe-Esbjerg. Það varð til þess að hann ákvað að rifta samningi við liðið. Hann verður löglegur með KA um áramót og því klár í slaginn þegar Íslandsmótið hefst á ný snemma í febrúar eftir hlé vegna Evrópumóts landsliða.
