Akureyrarvaka
Komast KA-strákarnir í bikarúrslitahelgina?
19.12.2025 kl. 06:00
Bjarni Ófeigur Valdimarsson fór hamförum í einu viðureign KA og Fram til þessa í vetur; hann gerði 12 mörk þegar KA-menn fögnuðu sigri á Fram í deildarleik í Reykjavík í október. Mynd: Skapti Hallgrímsson
Átta liða úrslit bikarkeppni karla í handknattleik, Powerade-bikarsins, fara fram í kvöld, föstudagskvöld. KA fær þá Íslands- og bikarmeistara Fram í heimsókn í KA-heimilið og sannarlega er mikið undir því sigurliðið tryggir sér sæti í fjögurra liða bikarúrslitahelgi, sem svo er kölluð.
- Powerade-bikar karla í handknattleik
KA-heimilið kl. 18:00
KA - Fram
Liðin hafa mæst einu sinni í deildinni í vetur og þá hafði KA betur á heimavelli Fram, vann 32:28 föstudagskvöldið 10 október.
Aðrir leikir átta liða úrslitanna eru viðureignir HK og Hauka, Fjölnis og ÍR og svo Aftureldingar og FH. Sigurliðin í þessum leikjum tryggja sér sæti í lokakafla keppninnar; undanúrslit fara fram fimmtudaginn 26. febrúar og sigurliðin það kvöld mætast í úrslitaleiknum tveimur dögum seinna, laugardaginn 28. febrúar.
- Vert er að vekja athygli á því að ókeypis er á leikinn í boði Hölds og Kjarnafæðis/Norðlenska.
