Um 8.000 með tekjur undir lægsta taxta

„Það er kominn tími til að stjórnmálamenn hætti að tala um eldri borgara sem einsleitan hóp. Eldri borgarar eru fjölmennur og fjölbreyttur hópur. Sumir hafa góðar tekjur og búa við ágæt kjör. Aðrir þurfa að snúa hverri krónu við og hafa verulegar áhyggjur af því hvernig þeir ná endum saman.“

Þetta segir Björn Snæbjörnsson, formaður Landssambands eldri borgara, í grein sem akureyri.net birti í dag.

Björn segir um 8.000 eldri borgara með heildartekjur undir lægsta taxta á vinnumarkaði. „Stjórnmálamenn verða að svara því hvort það sé ásættanlegt að fólk á efri árum búi við svo þröngan kost að hækkun á mat, lyfjum, húsnæði eða þjónustugjöldum geti haft veruleg áhrif á líf þess,“ segir hann.

Björn nefnir að ríki og sveitarfélög hækki gjaldskrár, matarkostnaður hækki, komugjöld hækki, þjónusta hækki og ýmis önnur gjöld leggist á heimilin. „Hver hækkun fyrir sig kann að virðast lítil í augum þeirra sem taka ákvörðunina. En fyrir þann sem hefur lítið til ráðstöfunar getur samanlögð hækkun orðið veruleg,“ segir hann og spyr: Getum við ekki lengur rekið samfélagið án þess að sækja í vasa þeirra sem minnst hafa?

„Ég spyr ekki þessarar spurningar til að ráðast á stjórnmálafólk,“ segir formaður Landssambands eldri borgara. „Ég spyr vegna þess að þetta snýst um pólitíska ábyrgð. Það er pólitíkin sem ákveður skattkerfið, bótakerfið, lífeyriskjörin og að stórum hluta gjaldskrár hins opinbera.“

Þess vegna verði stjórnmálaflokkarnir að svara.

Grein Björns Snæbjörnssonar: Stjórnmálin verða að svara þeim sem minnst hafa