Sesselía opnar dyrnar að Álfheimum

Það er erfitt að stilla Sesselíu Ólafs á eina hillu. Hún er leikkona, grínari, kennari, athafnastjóri og nú einnig skáldsagnahöfundur með glænýja fantasíusögu í bókaverslunum landsins sem ber nafnið Silfurberg.

„Ég held kannski að ég sé bara loksins heiðarleg við sjálfa mig,“ segir Sesselía spurð út í sitt nýjasta hlutverk sem skáldsagnahöfundur. „Ritlistin er eitthvað sem ég hef alltaf sogast að. Mér finnst rosalega gaman að leika en líka að skrifa leikrit og ljóð. Ég er í grunninn sögumaður, hvort sem það er í gegnum leiklist eða skrif. Og í raun er allt sem ég er að gera komið af sama stofninum, bara í mismunandi birtingarmyndum. Ég held samt að þetta hafi alltaf verið stærsti draumurinn, að skrifa fantasíuskáldsögu.”

Galdrakerfi og Álfheimar

Silfurberg er fyrsta bókin í fjögurra bóka seríu sem gerist í fantasíuheimi byggðum á íslenskum þjóðsögum. Sagan fjallar um Berglindi sem er 22 ára en hún reikar óvart inn í Álfheima þegar hún fer í útilegu með vinkonum sínum. Í Álfheimum er stríð milli ljósálfa og svartálfa, en í ljós kemur að Berglind er sjáandi, sem er mjög sjaldgæfur yfirnáttúrulegur hæfileiki, sem nýst getur álfunum. Sagan snýst að miklu leyti um að læra á innsæið og finna út hverjum er treystandi og þarf Berglind að takast á við nýjan heim, nýja vini og nýja hæfileika.

„Í bókinni er ég að leika mér með galdrakerfi sem byggir á frumefnunum, eldi, lofti, vatni, jörð og orku, en tengingin við frumefnin ræður því hvaða hæfileika fólk fær. Heitið á bókinni, Silfurberg, tengist því að Berglind fer í gegnum silfurbergsstein sem býr til annað eintak af henni. Það eintak fer til Mannheima en hún sjálf verður eftir í Álfheimum. Við fylgjumst með ferðalagi Berglindar um Álfheima í þessari fyrstu bók, á meðan næsta bók gerist meira í Mannheimum,” segir Sesselía.

Ástríða fyrir þjóðsögum og ævintýrum

Sesselía segir að sagan hafi lengi blundað í sér eða síðan 2014. „Ég var alltaf að bíða eftir því að einhver annar myndi skrifa þessa sögu. En svo náttúrulega skrifar enginn söguna sem ég er með í hausnum, svo ég varð bara að gera það,“ segir hún hlæjandi. Í Covid lauk hún við fyrstu 30.000 orðin og þremur árum seinna, þegar hún var valin bæjarlistamaður Akureyrar, fékk hún loksins rými til að klára verkið. „Ég hafði strax samband við Bókabeituna og þær svöruðu að bragði og voru mjög til í að fá þessa bók.“

Bókin er að sögn Sesselíu fyrir alla þá sem hafa gaman af fantasíubókmenntum en fellur þó í flokk ungmennabókmennta. „Jú, þetta er klárlega unglingabók. En í sjálfu sér skrifaði ég þetta bara fyrir mig, þannig að þetta er bók fyrir manneskjur eins og mig sem hafa gaman af fantasíum. Þetta spinnst í rauninni út frá áhuga mínum og ástríðu fyrir íslenskum þjóðsögum og ævintýrum um álfa og tröll og allt þar á milli.“

Álfar eins og manneskjur 

Aðeins sex nýjar íslenskar bækur koma út fyrir jólin í flokknum bækur fyrir ungmenni og er Silfurberg, eins og áður segir, ein þeirra. „Þó að umræðan sé á þá leið að krakkar séu hættir að lesa, þá held ég að vandamálið sé bara að við séum ekki að bjóða þeim nóg af spennandi bókum í öllum flokkum, sumir vilja lesa fantasíur eða hrollvekjur á meðan aðrir vilja kannski rómantískar sögur eða glæpasögur.“ Sesselía bætir því við að Silfurberg, bók sem er á íslensku með íslenskri sagnahefð og alíslenskum töfrum, en samt aðgengileg nútímalesendum, sé hennar framlag til að auka lestrarúrval fyrir ungmenni þjóðarinnar.

Einhverjir kunna að spyrja hvort bók sem leitar fanga í íslenskum þjóðsögum höfði virkilega til ungmenna landsins í dag en Sesselía er þess fullviss, a.m.k. hjá ungmennum sem hafa gaman af ævintýrum á annað borð. Að hennar sögn eru Álfheimarnir mjög spennandi sögusvið þar sem allt getur gerst. „Álfar eru oft krúttgerðir en ég vildi fjalla um þá eins og ég kynntist þeim í þjóðsögunum. Sumir vilja vel en aðrir alls ekki, bara eins og er með manneskjur. Sumir álfar í þjóðsögunum vilja fá hjálp eða bjóða hjálp á meðan aðrir vilja helst leika sér að fólki og kvelja það. Og svo er það lesandans að finna út hverjum er treystandi,“ segir Sesselía, sem er nú þegar farin að hugsa næstu bók þó óvíst sé hvenær hún kemur út. Þessa stundina er hún á kafi í að vinna að söngleik með Villa vandræðaskáldi og svo er í nógu að snúast við að kynna Silfurberg. „Beinagrindin fyrir næstu bók er tilbúin og auðvitað langar mig til þess að koma henni út sem fyrst því meðan ég er rétt að byrja á henni þá er bók númer þrjú líka byrjuð að pota í mig,“ segir Sesselía, spennt fyrir framhaldinu.

Hefur ekki persónulega reynslu af álfum

Ekki er þó hægt að sleppa Sesselíu án þess að spyrja hana út í það hvort hún trúi sjálf á álfa? „Ég vil ekki vera að storka neinu með því að segjast ekki trúa á álfa… Ég myndi ekkert vera með læti í kringum álfasteina eða að troða á einhverjum álagablettum. Ég er bara alltof nálægt sveitinni í mér til þess að þora því,“ segir Sesselía og viðurkennir að hún hafi ekki neina persónulega reynslu af álfum, ekki enn a.m.k. „Ég lít fyrst og fremst á þjóðsögurnar sem náttúruvirðingu. Þetta eru ómetanlegar sögur sem kenna okkur að lifa með náttúrunni og mér finnst um að gera að halda þessari arfleifð við og búa til nýjar sögur fyrir nútímann,“ segir Sesselía að lokum.

Þess má geta að Sesselía er að kynna bókina sína á eftirfarandi stöðum á næstunni:

• 3. desember – Gunnarshús í Reykjavík kl. 20
• 4. desember – Amtsbókasafnið á Akureyri kl. 20
• 5. desember – Bókasafn Húsavíkur kl. 16
• 11. desember – Kaffihúsið Hérna, Húsavík, kl. 17