Sigurður Helgi og Inga Björg til liðs við KA

Blakdeild KA hefur fengið góðan liðsstyrk fyrir komandi tímabil en systkinin Sigurður Helgi Brynjúlfsson og Inga Björg Brynjúlfsdóttir eru gengin til liðs við KA frá Völsungi á Húsavík.

Í frétt á vefsíðu KA segir að þrátt fyrir ungan aldur hafi þau bæði vakið athygli undanfarin ár, átt sæti í yngri landsliðum Íslands, og félagið bindur vonir við að þau styrki bæði karla- og kvennaliðið í baráttunni á toppi íslensks blaks á næsta tímabili. Karlalið KA varð Íslandsmeistari í vetur en kvennaliðið hafnaði í öðru sæti í öllum keppnum sem það tók þátt í og ljóst að bæði liðin ætla sér að berjast áfram á toppnum.

Sigurður Helgi er 19 ára gamall og spilar á miðju. Hann hefur leikið fyrir Völsung frá því hann var 13 ára gamall en hann var valinn besti leikmaður Völsungs árið 2023. Hann var fyrirliði liðsins á síðustu leiktíð en Völsungur komst meðal annars í úrslitahelgi Kjörísbikarsins þar sem Sigurður átti virkilega gott tímabil.

Inga Björg er 16 ára gömul og hefur undanfarin tvö ár verið kjörin efnilegasti leikmaður Unbroken-deildarinnar og það verðskuldað en Inga hefur þrátt fyrir ungan aldur verið í lykilhlutverki í öflugu liði Völsungs sem lék til úrslita um Íslandsmeistaratitilinn árið 2025 og féll úr leik gegn KA í undanúrslitum á nýliðnu tímabili.

Í fréttinni segir að hjá KA sé lögð rík áhersla á unga leikmenn og sterkt yngriflokkastarf hafi verið eitt af lykilatriðum í uppbyggingu félagsins undanfarin ár. Koma Sigurðar og Ingu fellur vel að þeirri stefnu og segja forsvarsmenn félagsins spennandi að fá þau inn í metnaðarfullt umhverfi KA.