Svavar Alfreð Jónsson

Skemmdarverk unnin á flötum á Jaðarsvelli

Valur Sæmundsson skrifar 27. apríl 2026 | kl. 14:00

Ljót og djúp för eftir vélknúið farartæki á nokkrum flötum Jaðarsvallar blöstu við starfsfólki GA í morgun. Þetta eru mestu skemmdir sem hafa verið unnar á vellinum í mörg ár. Myndir af vefsíðu GA.

Það var ófögur sjón sem blasti við starfsmönnum Golfklúbbs Akureyrar (GA) í morgun þegar þeir fóru út á völl og sáu að miklar skemmdir höfðu verið unnar á nokkrum flötum á Jaðarsvelli. Ljóst þykir að skemmdirnar séu eftir vélknúið hjól, eða krossara, að öllum líkindum rafmagnskrossara, og hefur hann tætt upp flatirnar og skilið eftir ljót sár.

Hér má sjá skemmdirnar á 5. flöt vallarins.

Umferð vélknúinna ökutækja er með öllu óheimil á Jaðarsvelli og óskar golfklúbburinn eftir því að fólk sem gengur um göngustígana sem liggja gegnum golfvöllinn að láta vita ef vart verður um slíka umferð á vellinum. Lögreglu hefur þegar verið gert viðvart um málið.

„Þetta er gífurlega svekkjandi að sjá, við vinnum sleitulaust hér við að koma vellinum í gegnum veturinn og svo fáum þetta eins og blauta tusku í andlitið. Þetta eru mestu skemmdir sem hafa verið unnar á vellinum í fjölmörg ár,“ segir Steindór Kr. Ragnarsson, framkvæmdastjóri GA í frétt á vef klúbbsins í morgun.

Skemmdir á 4. flöt.

„Við munum gera allt okkar til að komast til botns í þessu. Við erum að vinna úr okkar myndavélakerfi og munum afhenda það efni til lögreglu en óskum jafnframt eftir því að aðilinn gefi sig fram,“ bætir Steindór við en völlurinn er á mjög viðkvæmum stað um þessar mundir þegar frostið er að fara úr honum og mikil bleyta og því hafa svona skemmdarverk gríðarleg áhrif.