„Geta þau ekki alveg borgað meira?“

Sjálfstæðisflokkurinn stendur fyrir fundi í dag um fyrirhugaðar skattahækkanir ríkisstjórnarinnar á baðlón. Fundurinn fer fram á veitingastað Skógarbaðanna, Skógur Bistro, og hefst kl. 17:00.

 

Jens Garðar Helgason, varaformaður Sjálfstæðisflokksins og oddviti í Norðausturkjördæmi, Berglind Ósk Guðmundsdóttir oddviti Sjálfstæðisflokksins á Akureyri og Finnur Aðalbjörnsson eigandi Skógarbaðanna, verða með framsögu en svo verður opnað fyrir umræður.

„Ferðaþjónustan hefur lýst yfir þungum áhyggjum af þessari skattahækkun ríkisstjórnarinnar en til stendur að hækka virðisaukaskatt á baðlón úr ellefu prósentum í 24 prósent. Þetta bætist við kílómetragjaldið sem nú þegar hefur áhrif á bílaleigurnar og þ.a.l. ferðaþjónustu á Íslandi,“ segir í tilkynningu um fundinn.

 

„Alls eru fjögur stór baðlón í Norðausturkjördæmi; Skógarböðin á Akureyri, VÖK á Egilsstöðum, Jarðböðin á Mývatni og Geosea á Húsavík sem öll hafa fjárfest mikið á undanförnum árum. Nú stendur yfir enn meiri uppbygging í Skógarböðunum og Jarðböðunum,“ segir í tilkynningunni.

 

„Skattahækkanir ríkisstjórnarinnar virðast engan endi ætla að taka. Áfram er ráðist á landsbyggðina og nú er spjótunum beint að ferðaþjónustunni. Akureyringar og Norðausturkjördæmi í heild sinni eiga þessum frábæru baðlónum mikið að þakka en þau hafa fjárfest gríðarlega í sinni uppbyggingu og skapað störf og tekjur fyrir sitt nærumhverfi. Ég hlakka til að eiga samtal við Akureyringa og nærsveitunga um þessi mál,“ segir Jens Garðar Helgason, varaformaður Sjálfstæðisflokksins.

 

Hlekkur á viðburðurinn á Facebook: https://fb.me/e/eQ7yTnm18