Davíð frá Fagraskógi og „Brennið þið vitar“

SÖFNIN OKKAR – 78

Frá Héraðsskjalasafninu á Akureyri_ _ _

Akureyri.net heldur áfram að opna dyr safnanna í bænum lesendum til fróðleiks og skemmtunar. Það er gert vikulega, á fimmtudögum.

„Hjartað heimtar meira en húsnæði og brauð“ eru lokaorðin í ljóði Davíðs Stefánssonar frá Fagraskógi, Dalabóndi. Ljóðið birtist í Í byggðum árið 1933 og flokkast líklega ekki með þekktari ljóðum Davíðs en er þörf áminning þess að hamingjan er ekki endilega þar sem silfið og fjörið er. Davíð orti ekki bara ljóð sem gaman er að syngja, hann sagði okkur svo margt í ljóðunum.

Götur í nýjasta hverfi Akureyrar, Hagahverfi, eru kenndar við kunna, látna Akureyringa eins og áður hefur verið fjallað um á þessum vettvangi; fólk sem bæri heiður vegna starfa fyrir bæjarsamfélagið og hefði með frægð sinni og verkum auglýst nafn bæjarins, eins og nafnanefnd sveitarfélagsins lagði til á sínum tíma. Davíðshagi í Hagahverfinu er nefndur eftir Davíð Stefánssyni frá Fagraskógi (1892-1964).

Í manntalsskjölum kemur fram að Davíð bjó á Akureyri frá 1926 og er skráður bókavörður allt til 1949 en þá og eftir það hafði hann starfsheitið rithöfundur. Davíð bjó í Barnaskólahúsinu í Hafnarstræti 53 frá 1933 til 1943 og flutti þá í nýbyggt hús sitt við Bjarkarstíg 6.

Davíð var amtsbókavörður frá 1925 til 1951. Hann var útnefndur heiðursborgari Akureyrar frá og með 21. janúar 1955, eða á sextugsafmælisdaginn. Heiðursborgarabréfið er meðal þess sem varðveitt er í skjalasafni Davíðs á Héraðsskjalasafninu en auk þess er þar að finna handrit að ljóðabókum og eitt og annað gott.

Sjá betur hér: Úr fórum Davíðs Stefánssonar frá Fagraskógi

Skjal dagsins er sótt í skjalasafn Davíðs og er handrit af einu þekktasta ljóði hans. Ljóðið er í raun hluti af hátíðarljóði hans Að Þingvöllum 930-1930 sem Davíð orti og sendi inn í samkeppni sem efnt var til vegna Alþingishátíðarinnar á Þingvöllum 1930. Davíð og Einar Benediktsson skáld deildu með sér fyrsta sæti í keppninni en ljóð Davíðs var valið til flutnings á hátíðinni. Að því búnu fór fram annar hluti samkeppninnar þ.e. að semja tónlist við ljóðið og varð Páll Ísólfsson hlutskarpastur.

Friðrik G. Olgeirsson segir um ljóðið í ævisögu sinni um Davíð, Snert hörpu mína: „Hátíðarljóð Davíðs, ,,Að Þingvöllum 930-1930“, er í þrettán hlutum eða flokkum og það hefur sömu einkenni og slík hátíðarljóð hafa oftast; saga þjóðarinnar er vegsömuð og landnámsmönnum lýst sem hetjum af konungakyni. Hafa einstakir hlutar ljóðsins orðið fleygir með þjóðinni og lifað góðu lifi.“ Friðrik nefnir sem dæmi „Þú mikli, eilífi andi“, „Sjá dagar koma“ og „Brennið þið, vitar“, sem er ellefti hluti hátíðarljóðsins.