Jólaflug með easyJet þegar komið í sölu
Flug easyJet næsta vetur milli Akureyrar og Gatwick annars vegar og Manchester hins vegar er komið í sölu á heimasíðu flugfélagsins. Forsjálir geta því bókað jólaferðina strax.
Samkvæmt heimasíðu easyJet er fyrsta flug vetrarins frá Akureyri til Gatwick flugvallar í London þann 27. október og Manchester flug er fáanlegt frá 14. nóvember. Nú er hægt að kaupa miða til beggja þessara áfangastaða út janúar 2027. Norðlendingar þurfa þó ekki að örvænta því samkvæmt upplýsingum frá Markaðsstofu Norðurlands eiga, eftir því sem best er vitað þar á bæ, fleiri flug eftir að bætast við, bæði seinni hluta vetrar og einnig haustflug til London.
Að sögn Hjalta Páls Þórarinssonar, verkefnastjóra Flugklasans Air 66N, mun Manchesterflugið væntanlega hefjast 14. nóvember eins og komið er inn á vefinn og væntanlega verður flogið til marsloka eins og áður. Þá mun London-flugið að öllum líkindum hefjast í októberbyrjun eins og áður, þar sem október 2025 seldist mjög vel.
Akureyri.net rýndi lauslega í verðið á jólaflugi easyJet og valdi einn vinsælasta vetraráfangastað Íslendinga, Tenerife:
- Ef valið er að fara þann 19. desember frá Akureyri með heimkomu þann 5. janúar þá er ódýrasta verð fyrir einn um 94 þúsund krónur. Gista þarf í Bretlandi á báðum leiðum.
- Ef ferðadagar á þessari sömu flugleið eru valdir fyrr í desember eða seinna í janúar er hins vegar hægt að ná verðinu töluvert niður, til dæmis ef farið er á aðventunni þann 1. desember og komið heim þann 12. desember, þá kostar ódýrasta fargjaldið um 20 þúsund krónur fram og tilbaka til Tenerife með stoppi á Gatwick.
