Þór spáð neðsta sæti en að KA lendi enn í 7. sæti

Í gær var opinberuð spá fyrirliða, þjálfara og forráðamanna liðanna í efstu deild karla í knattspyrnu um það hvernig gengi liðanna yrði í sumar. Í spánni er gert ráð fyrir að KA muni sitja áfram sem fastast í 7. sæti deildarinnar, líkt og hlutskipti liðsins hefur verið sl. 3 ár, en Þórsurum er spáð neðsta sætinu. Samkvæmt spánni mun Víkingur verja Íslandsmeistaratitil sinn frá því í fyrra.

Þórsarar eru vissulega nýliðar í deildinni en þetta er fyrsta spáin fyrir mótið sem gerir ráð fyrir að þeir falli. Sigurður Heiðar Höskuldsson, þjálfari Þórs, sagði í viðtali við fotbolti.net í gær að spáin hefði komið honum á óvart en var ekkert ósáttur. „Það kom svolítið á óvart, en ég er vanur þessu og ég held að það eina sem þetta geti gert er að henda einhverju bensíni á klúbbinn,“ sagði Siggi í viðtalinu. Hann segir að það leggist vel í sig að mæta Val á útivelli í fyrsta leik tímabilsins. „Það verður mikið test fyrir okkur sem nýliða og liði sem spáð er neðsta sæti að fara og keppa við lið sem ætlar sér titilinn, á útivelli í fyrsta leik. Það verður mjög spennandi og við þurfum að vera alveg 100% í þeim leik,“ sagði Siggi ennfremur og sagðist ennfremur vera mjög sáttur við leikmannahópinn og Þórsarar séu ekki að leita að frekari liðsstyrk.

Samkvæmt áðurnefndri spá verður þetta lokastaðan í efstu deild karla í knattspyrnu, Bestu deildinni, árið 2026:

1. Víkingur
2. Breiðablik
3. Stjarnan
4. KR
5. ÍA
6. Valur
7. KA
8. Fram
9. FH
10. ÍBV
11. Keflavík
12. Þór