Mjólkurbikar karla: Þór heima, KA í Fellabæ

Bikarleikir í knattspyrnu eru áberandi á íþróttadagskránni víða um land í dag. Bæði karlaliðin á Akureyri spila í 32ja liða úrslitum í dag, Þór á heimavelli, en KA á útivelli.

Mjólkurbikarkeppni karla í knattspyrnu er hafin fyrir nokkru með forkeppni og komið að 32ja liða úrslitunum þar sem liðin í Bestu deild karla koma inn í pottinn. Fyrstu leikir 32ja liða úrslitanna verða í dag og eiga bæði Þór og KA leik.

Þór fékk heimaleik og fer hann fram í Boganum þar sem frágangi við nýja keppnisvöllinn á svæðinu er ekki lokið. Liðin eru bæði að koma inn í keppnina í 32ja liða úrslitin.

• Mjólkurbikarkeppni karla í knattspyrnu, 32ja liða úrslit
  Boginn kl. 14
  Þór - FH
• Útsending: Rúv
  Opin dagskrá

KA leikur í Fellabæ

KA fékk útileik gegn Hetti og er leikið í Fellabæ. Höttur hóf leik í keppninni með 5-0 sigri á Neista frá Djúpavogi, en Neisti hafði áður unnið Einherja á Vopnafirði 5-2. KA kemur inn í keppnina í 32ja liða úrslitunum.

• Mjólkurbikarkeppni karla í knattspyrnu, 32ja liða úrslit
  Rafey-völlurinn í Fellabæ kl. 14
  Höttur - KA
• Útsending: Livey.events
  Áskrift að rás eða stökum leikjum

Höttur og KA mætast á Rafey-vellinum, svokallaða, sem er þó betur þekktur undir nafninu Fellavöllur, en völlurinn er í Fellabæ.