„Ég hef ekki fengið neitt upp í hendurnar“

Nýr bæjarstjóri Akureyrar, Berglind Ósk Guðmundsdóttir, er aðeins 32 ára gömul en með fjölbreytta reynslu í bakpokanum. Akureyri.net lék forvitni á að vita meira um konuna sem nú hefur sest í bæjarstjórastólinn og sendi Snæfríði Ingadóttur í heimsókn til hennar í Ráðhúsið.

Þegar blaðamaður gengur inn á skrifstofu bæjarstjórans tekur á móti henni brosmild kona sem virðist furðu afslöppuð miðað við að hafa nýverið tekið við einu stærsta stjórnunarstarfi landsbyggðarinnar. Það er erfitt að átta sig á því að konan sem situr hinum megin við borðið sé aðeins rétt skriðin yfir þrítugt. Á bak við rólegt yfirbragðið leynist þó fjölbreytt reynsla; hún lauk menntaskóla á tveimur árum, vann meðal annars í álveri á Reyðarfirði, er lögfræðimenntuð, þriggja barna móðir og fyrrverandi þingkona. En sagan um Berglindi hefst ekki í Ráðhúsinu heldur í Kópavogi.

Alin upp í Kópavogi

Þótt margir líti á Berglindi sem „ekta Akureyring“ er raunveruleikinn sá að hún er fædd og uppalin í Kópavogi. Tengslin við Akureyri liggja hins vegar djúpt í fjölskyldunni og urðu síðar til þess að hún flutti norður til að nema lögfræði við Háskólann á Akureyri, stofnaði þar fjölskyldu og byggði upp feril sem hefur nú leitt hana í stól bæjarstjóra.

„Pabbi minn er Akureyringur og ég var mikið hér fyrir norðan sem barn. Fólk gerir oft bara ráð fyrir að ég sé fædd og uppalin hér,“ segir Berglind, sem lýsir sér sem mikilli pabbastelpu og segir að tengslin við Akureyri hafi ekki síst orðið til í gegnum föður sinn. Faðir hennar, Guðmundur Sigurbjörnsson, er húsasmíðameistari en móðir hennar, Ásdís Loftsdóttir, er hönnuður og ættuð frá Vestmannaeyjum. Berglind er yngst fimm systkina; hún á tvær alsystur og tvö hálfsystkini. Foreldrar hennar skildu þegar hún var orðin fullorðin. Í dag býr faðir hennar á Akureyri en móðir hennar í Frakklandi.

Kláraði menntaskólann á tveimur árum

Berglind gekk í Menntaskólann Hraðbraut og lauk stúdentsprófi aðeins 18 ára gömul. Skólinn var einkarekinn og starfaði á árunum 2003–2012 í Reykjavík. Námið var hraðferð í gegnum menntaskóla; tveggja ára lotunám sem krafðist mikillar vinnu og aga. „Mér gekk alltaf vel í námi. Systir mín hafði farið þessa leið og var mikil fyrirmynd fyrir mig svo ég ákvað líka að fara í þennan skóla,“ segir Berglind.

Þrátt fyrir að stefna á lögfræði tók hún sér tveggja ára hlé frá námi eftir stúdentspróf og fór út á vinnumarkaðinn. „Ég vann í fatabúð, á bensínstöð, í eldhúsi og svo tvö sumur í álverinu á Reyðarfirði.“ Vinna í álverinu er kannski ekki fyrsta starfið sem fólki dettur í hug þegar það sér fyrir sér verðandi lögfræðing eða bæjarstjóra, en Berglind segir að árin fyrir austan hafa verið bæði lærdómsrík og skemmtileg. „Vinnan í álverinu var ótrúlega skemmtileg og ég held enn sambandi við marga sem ég kynntist þar. Ég hafði mjög gaman af vélunum og öllu sem því fylgdi,“ segir hún og bætir við að hún eigi enn vinnuvélaskírteinið sitt.

Hitti eiginmanninn í crossfit

Tvítug flutti Berglind til Akureyrar og hóf nám í lögfræði við Háskólann á Akureyri. „Ég fór á stúdentagarðana og byrjaði í lögfræðinni haustið 2013,“ segir hún. Það var einnig á þessum árum sem líf hennar tók nýja stefnu utan skólastofunnar. Í náminu kynntist hún barnsföður sínum,Einari Birni Thorlacius, og árið 2016 eignaðist hún sitt fyrsta barn, Emilíu Margréti. Í dag á Berglind þrjú börn. Tvö þau yngstu,  Anton Dreki, f. 2023 og Marín Erla f. 2025., á hún með eiginmanni sínum, Daníel Matthíassyni, rekstrarstjóra hjá Stefnu, sem hún kynntist í CrossFit Akureyri. „Daníel er kletturinn minn. Hann grípur alla bolta og hefur stutt mig í gegnum öll mín krefjandi verkefni,“ segir Berglind og bætir við að án stuðnings hans hefði margt verið erfiðara.

Eftir að Berglind lauk meistaragráðu í lögfræði árið 2018 hóf hún störf hjá Lögmönnum á Norðurlandi. Þaðan lá leiðin fljótlega til Háskólans á Akureyri þar sem hún vann meðal annars að endurskoðun reglna skólans og innleiðingu persónuverndarlaga. Síðar varð hún lögfræðingur á rektorsskrifstofu háskólans. Samhliða vinnunni aflaði hún sér málflutningsréttinda fyrir dómstólum og tók æ virkari þátt í stjórnmálum. Þegar litið er til baka virðist ferillinn hafa þróast hratt, en Berglind segir sjálf að hún hafi alltaf verið markmiðadrifin og átt erfitt með að sitja auðum höndum.

Efnahagshrundið styrkti áhugann á stjórnmálum

Áhugi Berglindar á stjórnmálum kviknaði snemma. Á æskuheimilinu voru fréttir, samfélagsmál og stjórnmál reglulegt umræðuefni og hún segist hafa sogið í sig þær umræður, ekki síst frá föður sínum. „Ég var alltaf svampur á öll þessi samtöl um pólitík frá því ég var pínulítil,“ segir hún.

Áhuginn varð þó enn sterkari í kjölfar bankahrunsins. Foreldrar hennar voru bæði í eigin rekstri og fjölskyldan gekk í kjölfar hrunsins í gegnum erfiðar breytingar, meðal annars í húsnæðismálum.  „Þessi áhugi minn á stjórnmálum styrktist mjög mikið í hruninu þegar maður skildi ekkert hvað var að gerast. Mig langaði einfaldlega til þess að skilja kerfið betur,“ segir Berglind.

„Ég er krabbi í stjörnumerki og mér finnst það oft svolítið lýsandi fyrir mig. Skelin getur verið mjög þykk en ef fólk kemst inn fyrir hana þá er ég bara eins og sykurpúði.“ 

Leikskólamálin komu öllu af stað

Aðeins sextán ára gömul gekk hún í Sjálfstæðisflokkinn eftir að hafa kynnt sér stefnur allra flokkanna. „Ég tók þetta rosalega alvarlega og bar alla flokkana saman áður en ég valdi Sjálfstæðisflokkinn,“ rifjar hún upp. Það var hins vegar ekki fyrr en hún varð sjálf móðir að stjórnmálin fóru að verða meira en áhugamál. Þegar hún fór að glíma við biðlista og leikskólapláss fyrir dóttur sína fór hún að velta fyrir sér hvernig mætti bæta kerfið. „Þegar ég fór að glíma við leikskólakerfið og biðlistana fór ég að velta fyrir mér hvernig mætti gera hlutina betur. Þá ákvað ég að gefa kost á mér. Þannig að það voru eiginlega leikskólamálin sem ýttu mér út í sveitarstjórnarmálin.“

Góð reynsla á Alþingi

Árið 2018 steig Berglind sín fyrstu formlegu skref í stjórnmálunum þegar hún bauð sig fram fyrir Sjálfstæðisflokkinn í sveitarstjórnarkosningum á Akureyri. Hún skipaði fimmta sæti listans, varð varabæjarfulltrúi og tók sæti í frístundaráði. Á næstu árum jókst þátttaka hennar jafnt og þétt. Árið 2021 gaf hún kost á sér í prófkjöri Sjálfstæðisflokksins í Norðausturkjördæmi og hlaut annað sæti á framboðslistanum. Um haustið tók hún sæti á Alþingi þar sem hún sat eitt kjörtímabil.

Þótt tíminn á þingi hafi ekki verið langur segir Berglind reynsluna hafa kennt sér mikið. „Ég bý alveg vel að þessari reynslu að hafa fengið að sitja á þingi eitt kjörtímabil. Þetta var alveg ótrúlega skemmtilegt starf. Ég hafði mjög gaman af því að fá að kynnast þessu öllu saman,“ segir hún. Þingmennskan gaf henni ekki aðeins innsýn í landsmálin heldur einnig reynslu af samningum, stefnumótun og pólitískri forystu, reynslu sem hún telur nýtast sér vel í nýju hlutverki bæjarstjóra.

Einelti í æsku hafði áhrif

Talið berst að æskunni og hvernig hún hafi verið sem krakki. Berglind brosir þegar hún rifjar upp að hafa byrjað að drekka kaffi aðeins 11 ára gömul og viðurkennir að hafa líklega verið frekar markmiðadrifin og fullorðinsleg frá unga aldri. Þrátt fyrir að hafa síðar lagt fyrir sig lögfræði og stjórnmál segist hún alltaf hafa verið listatýpa. Sem barn eyddi hún löngum stundum við að mála og skapa og enn í dag sækir hún í skapandi verkefni þegar hún þarf að hlaða batteríin. „Ég hef alltaf haft ótrúlega gaman af því að mála,“ segir hún. Móðir hennar starfar sem hönnuður og telur Berglind að sköpunargleðin hafi líklega komið þaðan að einhverju leyti.

Þótt hún hafi verið virk í félagslífi skólans og síðar formaður nemendafélags voru unglingsárin ekki alveg áfallalaus. „Ég lenti í vægu einelti á miðstigi. Ég skipti um skóla út af því og skipti svo aftur til baka. Þetta mótaði mig alveg.“ Hún segir reynsluna hafa kennt sér að takast á við mótlæti og brynja sig gagnvart erfiðleikum. „Vegna þessarar reynslu á ég auðveldara með að loka mig af þegar eitthvað erfitt kemur upp. Það er líklega bæði kostur og galli.“

Þegar talið berst að því hvernig hún bregðist við álagi og gagnrýni grípur hún til stjörnumerkjanna sér til skýringar. „Ég er krabbi í stjörnumerki og mér finnst það oft svolítið lýsandi fyrir mig. Skelin getur verið mjög þykk en ef fólk kemst inn fyrir hana þá er ég bara eins og sykurpúði,“ segir hún og brosir.

„Ég hef ekki fengið neitt upp í hendurnar. Allt sem ég hef gert hef ég unnið fyrir. En það sem reynist mér erfiðast er þegar ljót ummæli snerta fólkið mitt.“ 

Hörð gagnrýni

Skelin hefur reyndar komið sér vel undanfarið því gagnrýni á ráðningu Berglindar sem bæjarstjóra hefur verið töluverð. Berglind viðurkennir að umræðan hafi komið sér á óvart, ekki síst vegna þess hversu hörð hún var á köflum.

Berglind telur að hluti gagnrýninnar hafi stafað af því að margir þekktu lítið til bakgrunns hennar og reynslu. Hún segir einnig að aldur hennar hafi án efa spilað inn í umræðuna. „Kannski áttuðu sig ekki allir á því að ég er með góða menntun og fjölbreytta starfsreynslu þrátt fyrir að vera ung,“ segir hún. Berglind veltir því jafnframt fyrir sér hvort kyn hennar hafi haft áhrif á umræðuna. Á meðan sumir hafi dregið í efa hvort hún hefði næga reynslu til starfsins hafi sambærilegar spurningar síður verið bornar upp þegar ungir karlar hafi verið ráðnir í ábyrgðarstöður. „Ég hef ekki fengið neitt upp í hendurnar. Allt sem ég hef gert hef ég unnið fyrir. En það sem reynist mér erfiðast er þegar ljót ummæli snerta fólkið mitt. Pabbi getur stundum alveg brotnað yfir umræðunni. Það er miklu erfiðara að sjá það en að lesa eitthvað um sjálfa mig,“ segir Berglind.

Hún bætir við að reynslan af Alþingi hafi hjálpað sér að takast á við gagnrýni og byggja upp þann skráp sem stundum þurfi í opinberu lífi. Hún segist enn sækja í málverkið þegar hún þurfi að slaka á en regluleg hreyfing sé einnig mikilvæg fyrir andlegu hliðina, þótt tíminn hafi verið naumur eftir að yngsta barnið fæddist. Þegar álagið eykst séu það þó fyrst og fremst nánustu aðstandendur sem hjálpi henni að halda jafnvægi „Ég tala mikið við manninn minn og systurnar mínar. Þau eru mitt bakland.“

Þótt bæjarstjórastarfið sé nýtt er ljóst að fjölskyldan stendur áfram í öndvegi hjá Berglindi. Þegar vinnudeginum lýkur bíða hennar ekki aðeins fundargerðir og framkvæmdaáætlanir heldur einnig þrjú börn, hundur og hversdagslegt fjölskyldulíf í Þorpinu.

• Nánar verður rætt við Berglindi á morgun en þá ræðir hún meðal annars um markmið sín sem bæjarstjóri Akureyrar og framtíðarsýn fyrir bæinn.