Starfshópur skoðaði aðstæður í Kristnesi
Starfshópur, sem heilbrigðisráðuneytið hefur skipað til að vinna að framtíðarsýn fyrir fasteignir Kristnesspítala, skoðaði aðstæður á staðnum í vikunni skv. heimildum akureyri.net en ekkert liggur fyrir um framhaldið. Hópurinn notaði tækifærið til þess arna í tengslum við fyrstu skóflustungu að nýbyggingu við Sjúkrahúsið á Akureyri á fimmtudaginn og undirritun samnings um jarðvegsvinnu.
Í starfshópnum eru fulltrúar heilbrigðisráðuneytisins, fjármála- og efnahagsráðuneytisins, Framkvæmdasýslunnar – Ríkiseigna og Sjúkrahússins á Akureyri
Eftir að ákveðið var í vikunni að flytja alla núverandi starfsemi SAk í Kristnesi til Akureyrar, vegna rakaskemmda og myglu, lék akureyri.net forvitni á að vita hvort ríkið – eigandi húsnæðisins – hyggist ráðast í að laga húsakostinn í Kristnesi þannig að hægt verði að hefja endurhæfingarþjónustu þar á ný.
Í skriflegu svari ráðuneytisins segir: „Engar framkvæmdir standa yfir á Kristnesspítala um þessar mundir. Verulegra úrbóta er þörf til að koma húsnæðinu í fullnægjandi og heilnæmt ástand og er ekki talið tímabært að ráðast í slíkar framkvæmdir fyrr en niðurstöður liggja fyrir um framtíðarnýtingu húsnæðisins og framtíðarskipan starfseminnar.“
- Frétt akureyri.net í vikunni:
