Golf: Kvennasveit GA endaði í öðru sæti

Keppni í 1. deildinni á Íslandsmóti golfklúbba lauk í dag. Kvennasveit Golfklúbbs Akureyrar (GA) stóð sig firnavel og lék til úrslita um Íslandsmeistaratitilinn við heimastúlkur í Golfklúbbi Mosfellsbæjar (GM) en þurfti að sætta sig við tap. Silfurverðlaunin eru engu að síður frábær árangur. Karlasveit GA endaði í 7. sæti af 8 liðum.

Úrslitaviðureignin í kvennaflokki milli GA og GM varð ekki eins spennandi og vonast var til. Mótið var haldið á Hlíðavelli, heimavelli GM, og ef til vill nutu Mosfellingar þess að þekkja völlinn út og inn. Þær Arna Rún Oddsdóttir og Kara Líf Antonsdóttir léku saman í fjórmenningi og náðu góðu jafntefli í sinni viðureign. Þar voru um tíma fjórum holum undir en unnu forskotið upp smám saman og jöfnuðu viðureignina með sigri á síðustu holunni. Lilja Maren Jónsdóttir vann sína viðureign í tvímenningi örugglega og hún vann alla fimm leiki sína á mótinu. Þær Andrea Ýr Ásmundsdóttir, Björk Hannesdóttir og Bryndís Eva Ágústsdóttir töpuðu allar sinni viðureign og lokatölur urðu 3,5-1,5 GM í vil.

Karlasveit GA hafnaði í 3. sæti í sínum riðli og lék því um 5.-8. sætið í úrslitakeppninni. Þar töpuðu strákarnir sínum viðureignum og enduðu í 7. sæti. Eini sigurleikur sveitarinnar var gegn botnliði Golfklúbbs Bolungarvíkur í riðlakeppninni og svo vakti athygli að GA-sveitin gerði jafntefli gegn sveit Golfklúbbs Reykjavíkur (GR), einnig í riðlakeppninni. GR-sveitin vann allar aðrar viðureignir sínar ýmist 4-1 eða 5-0 og vann Íslandsmeistaratitilinn afar sannfærandi.