Áttu skemmtilegar sögur eða minningar úr VMA?
Verkmenntaskólinn á Akureyri, VMA, verður fertugur á þessu ári. Skólinn var stofnaður árið 1984 og með því var framboð námsleiða á Norðurlandi eystra stóraukið. Afmælisárið verður haldið hátíðlegt, en á heimasíðu skólans er óskað eftir fulltrúum úr stórum hópi útskrifaðra nemenda, til þess að funda um væntanlega afmælishátíð sem verður haldin á afmælisdeginum 29. ágúst næstkomandi.
Í fréttinni segir að það sé löngu tímabært að kalla saman útskrifaða nemendur, sem nú skipta þúsundum, til þess að halda veglegt hóf og fagna skólanum sínum. Lumar þú á minningum eða sögum úr VMA?
Þeir fyrrum nemendur skólans sem hafa áhuga á að koma að hugmyndavinnu og skipulagi þessa viðburðar, eru beðin um að hafa samband með því að senda tölvupóst á vmahatid@vma.is
Búið er að skipa 40 ára afmælisnefnd VMA, en nefndin stefnir að því að boða til fjarfundar í lok þessa mánaðar til að ræða hugmyndir um VMA-hátíð í ár og til framtíðar. Í afmælisnefndinni eru:
- Sigríður Huld, skólameistari
- Óskar Þór, fréttamaður heimasíðu VMA og stuðningsfulltrúi
- Valgerður Dögg, kennari í VMA
- Steinar Bragi, formaður nemendafélagsins Þórdunu
