Fara í efni
Fréttir

Síðasti heimaleikur Þórsara á árinu

Halldór Yngvi Jónsson á flugi í bikarleik Þórs gegn Aftureldingu á dögunum. Ljósmynd: Skapti Hallgrímsson

Þórsarar taka á móti ungmennaliði Selfoss í Íþróttahöllinni í kvöld í Grill66 deildinni í handbolta, næst efstu deild Íslandsmótsins. Leikurinn hefst klukkan 19.30.

Þetta er síðasti heimaleikur Þórsliðsins á þessu ári. Strákarnir mæta næst ungmennaliði Vals í Reykavík á laugardag eftir viku og leika síðan gegn Fjölni í Grafarvogi föstudaginn 16. desember. Eftir það verður gert hlé á keppni og í fyrsta leik eftir áramót fá Þórsarar lið Kórdrengja í heimsókn 20. janúar.

Þórsliðið er sem stendur í 5. sæti deildarinnar með sjö stig eftir átta leiki en Selfyssingar eru í 8. sæti með fimm stig að loknum sjö leikjum.

Þórsarar unnu síðasta leik nokkuð örugglega, gegn ungmennaliði Fram í Reykjavík. Það var fyrsti leikur liðsins eftir að þjálfaranum, Stevce Alusovski, var sagt upp störfum. Halldór Örn Tryggvason stýrir liðinu í kvöld en síðan tekur Geir Kristinn Aðalsteinsson við þjálfuninni til vors og stóri bróðir, Sigurpáll Árni, verður honum til aðstoðar.