Daníel í þjálfarateymi A-landsliðs kvenna

Daníel Andri Halldórsson, þjálfari kvennaliðs Þórs í körfubolta, hefur verið ráðinn aðstoðarþjálfari A-landsliðs kvenna ásamt tveimur öðrum. Körfuknattleikssamband Íslands (KKÍ) tilkynnti þetta í dag.

Finninn Pekka Salminen var á dögunum ráðinn þjálfari liðsins til tveggja ára og í dag var greint frá því að aðstoðarmenn hans verði Daníel Andri, Ólafur Jónas Sigurðsson, þjálfari Stjörnunnar og Emil Barja, þjálfari Hauka.

Fyrsta verkefni landsliðsins undir stjórn nýs þjálfarateymis verða æfingabúðir frá 14. til 24. ágúst. Þær eru liður í undirbúningi fyrir undankeppni Evrópumótsins sem fram fer 2027 – EuroBasket 2027. Dregið verður í riðla 23. júlí næstkomandi og fyrstu leikirnir verða í „landsleikjaglugga“ 12.-18. nóvember.