Sigfús Karlsson skrifar:

Enn á ný getur Jóhanna Sigurðardóttir, forsætisráðherra, ekki setið á sér að fara með þá rangfærslu að Framsóknarflokkurinn hafi skert barnabætur á tímum uppssveiflu og góðæris í samfélaginu. Þessi orð lét forstætisráðherra falla, sem og svo oft áður, í óundirbúnum fyrirspurnartíma þann 25. mars s.l. þegar alþingismaðurinn Birkir J. Jónsson var með þá fyrirspurn er varðaði þau loforð fyrri ríkisstjórnar, sem Jóhanna Sigurðardóttir átti sæti í sem félagsmálaráðherra, þess efnis að hefja útgreiðslu barnabóta mánaðarlega frá 1. apríl s.l.

Fyrri ríkisstjórn, Sjálfstæðisflokks og Samfylkingar, tilkynnti þann 8. desember 2008 að uppi væru áform þess efnis að hefja mánaðarlega greiðslur barnabóta þann 1. apríl 2009 eins og áður er getið, í stað þess að fá barnabæturnar greiddar fjórum sinnum á ári. Núverandi ríkisstjórn, Samfylkingar og Vinstri Grænna, hefur gefið það út og fallið frá þessum mánaðarlegu greiðslum, en það var ákveðið á þeim forsendum að mánaðarlega greiðslur hefðu komið verr út fyrir fjölskyldur í landinu og betra sé að viðhalda gamla kerfinu. Þá kom fram í svari forsætisráðherra við fyrirspurninni að hún héldi ekki að þetta breytti mjög miklu fyrir barnafjölskyldur, þ.e. að fá barnabæturnar greiddar út mánaðarlega.

Síðan segir forsætisráðherra í svari sínu til þingmannsins. „En háttvirtur þingmaður er alltaf á hálum ís þegar hann talar um barnabætur vegna þess að þær voru skertar í tíð Framsóknarflokksins á tímum mikillar uppsveiflu og góðæris í samfélaginu.“

Þetta svar, og þessi orð forsætisráðherra eru alveg makalaus, og ekki í fyrsta skipti sem Jóhanna Sigurðardóttir reynir eftir fremsta megni að koma með tilhæfulausar staðhæfingar til að slá ryki í augu kjósenda um Framsóknarflokkinn og barnabætur, og eru tilefni greinar þessarar.

Skoðum fyrst orðin „á tímum mikillar uppsveiflu og góðæris í samfélaginu”, áður en ég ræði barnabæturnar sjálfar. Hvenær var þessi mikla uppsveifla og góðæri? Getum við verið sammála um að árin 2003-2007 hafi verið einstaklega góð? Jú ég held að flestir geti verið sammála um það. Þá voru Framsóknarmenn í ríkisstjórn með Sjálfstæðismönnum og sennilega sá tími sem Jóhanna Sigurðardóttir er að vitna til. Eðli málsins samkvæmt lækka tekjutengdar barnabætur í uppsveiflu og góðæri þegar fólk hefur hærri laun. Það er rökrétt og það segja lögin um barnabætur sem alþingismenn hafa sett.
Skoðum þá hvernig barnabætur þróuðust á þessum árum sem vitnað er í , „á tímum mikillar uppsveiflu og góðæris í samfélaginu.” Í byrjun þess kjörtímabils, árið 2003 voru greiddar 36.308 kr. með öllum börnum yngri en 7 ára í formi barnabóta. Í lok kjörtímabilsins eða árið 2007voru greiddar 56.096kr. Þannig að barnabætur höfðu hækkað um kr. 19.788 eða um 54,5% með öllum börnum yngri en 7 ára á árunum 2003-2007 í tíð ríkisstjórnar Framsóknarflokksinns. Á sama tíma hækkaði vísitala neysluverðs, sú vísitala sem allt snýst um í dag sem og þá, frá janúar 2003 til janúar 2007 um 18,89%.

En hvað hefur Samfylkingin, með Jóhönnu Sigurðardóttur í broddi fylkingar, gert í barnabótum? Skoðum það aðeins. Ríkisstjórn Samfylkingar og Sjálfstæðisflokks tók við á vordögum 2007. Þá voru barnabætur sem greiddar voru með öllum börnum yngri en 7 ára eins og áður segir 56.096 kr. Nú árið 2009, tveimur árum seinna og Samfylkingin situr í ríkisstjórn með Vinstri Grænum eru sömu barnabætur 61.191 kr. með öllum börnum yngri en 7 ára. Það er hækkun að fjáræð kr. 3.300 kr. eða um 5,7%. Hvað hefur vísitala neysluverðs, sem eins og áður er mælikvarðinn á lánunum okkar og allt snýst um og Samfylgingin komst í ríkisstjórn hækkað á þessum tveimur árum frá janúar 2007 til janúar 2009? Vísitalan hefur hækkað um 23,17%

Við skulum láta staðreyndirnar tala sínu máli í stað þess að kasta grjóti úr glerhúsi. XB fyrir barnafjölskyldur í landinu.
Höfundur skipar 4. sæti á lista framsóknarmanna í norðausturkjördæmi fyrir alþingiskosningarar 25. Apríl 2009, og er fjögurra barna faðir.