Klippimynd í DaLí

Karen Dúa Kristjánsdóttir opnar sýninguna „Klippimynd“ í DaLí Gallery, Brekkugötu 9á Akureyri, laugardaginn 10. nóvember kl. 17. Verk Karenar Dúu er eins og titillinn segir, tilraun með klippimynd á vegg.

Karen Dúa er fædd á Akureyri árið 1982. Hún tók stúdentspróf við Menntaskólann á Akureyri árið 2002 og lauk myndlistarnámi frá fagurlistadeild Myndlistaskólans á Akureyri vorið 2006. Karen Dúa rekur Gallery BOX ásamt fleirum og er vinnustofa hennar staðsett þar á sama stað. Hún hefur tekið þátt í nokkrum samsýningum en sýningin klippimynd í DaLí gallery er þriðja einkasýning hennar að námi loknu. Önnur sýning hennar hjá Veggverk stendur yfir á sama tíma og geta sýningargestir að rölt þangað og litið augum verk hennar þar í leiðinni.

Sýning Karenar Dúu í DaLí Gallery stendur til 25. nóvember. DaLí Gallery er opið meðan sýningar standa yfir á föstudögum og laugardögum frá kl. 14-17.