Snjóbretta og tónlistarhátíðin AK Extreme fer fram á Akureyri um helgina 5-7 apríl

Vikudagur segir frá

Snjóbretta- og tónlistarhátíðin AK Extreme fer fram á Akureyri um helgina, dagana 5.-7. Apríl. Hátíðin er haldin Hlíðarfjalli og í miðbæ Akureyrar, nánar tiltekið í Gilinu, Sjallanum og Græna Hattinum. Hápunktur AK Extreme verður Eimskips gámastökkið í Gilinu á laugardagskvöldið 7. apríl en þar koma saman færustu snjóbrettamenn Íslands ásamt erlendum keppendum þar sem þeir keppa um AK Extreme titilinn og hringinn. Mikill undirbúningur hefur staðið yfir alla vikuna vegna hátíðarinnar. Hilmar Þór Sigurjónsson er einn af þeim sem stendur að hátíðinni og hann hefur staðið í ströngu í vikunni við undirbúning. „Það fer öll vikuna í undirbúning og þetta er hörkupúl,“ segir Hilmar í samtali við Vikudag. Veðrið er hagstætt fyrir aðstandendur mótsins en búist er við frosti næstu daga og kyngdi niður snjónum þegar blaðamaður ræddi við Hilmar. „Finnur verktaki hefur hjálpað okkur mikið en hann hefur safnað snjó í hauga víðsvegar um bæinn. Ef hann væri ekki með okkur í þessu þá væri þetta ekki hægt.“ Hilmar segir að vörubílar fari um 200 ferðir í Gilið til að flytja snjó. „Við lentum í vandræðum í fyrra vegna snjóaleysis og það var okkur dýrt, en þetta er mun betra í ár. Eins og staðan er núna er mikil snjókoma og veðurspáin er þannig að snjórinn ætti að halda.“ Markmiðið að fá fólk í bæinn Hilmar segir eitt meginmarkmið hátíðarinnar sé að fá fólk í bæinn. „Við viljum fá sem flesta hingað til að njóta með okkur og hátíðin hefur notið gríðarlegra vinsælda. Það eru fáir snjóbretta-og vélsleðaáhugamenn sem sitja heima hjá sér þegar hátíðin fer fram. Til marks um áhugann þá höfum við aldrei verið með jafnmarga erlenda keppendur og í ár og við lentum eiginlega í vandræðum vegna þess að það var svo mikil ásókn erlendis frá. Við höfum ekki lent í því áður og þetta er lúxuvandamál.

Myndir frá Burn Jib Sesson 2017

Myndir frá AK-Extreme Eimskips gámastökkinu 2017

Hilmar Þór Sigurjónsson Mynd: Þröstur Ernir