Menningarfélag Akureyrar frumsýnir ævintýrið um Pílu Pínu

pilapina_mak_230x3252020Sunnudaginn 7. febrúar frumsýnir Menningarfélag Akureyrar ævintýrið um Pílu Pínu eftir Heiðdísi Norðfjörð.

Heimurinn er betri en við höldum!

Píla Pína á sér eina ósk heitar öllu. Það er að færa móður sinni gleði. Alveg síðan Gína mamma hennar hraktist burt frá fjölskyldu sinni og heimkynnum vegna kattarins ógurlega, hefur hún verið döpur. Píla Pína leggur  þá upp í hættulegt ferðalag til að lækna hjarta móður sinnar. Hún þarf að vera sniðug og hugmyndarík til þess að ná á leiðarenda heil og höldnu. Á leið sinni lærir hún að hafa trú á sjálfri sér. Hún lærir að mýs geti allt…..jafnvel flogið!

Ævintýrið um Pílu Pínu eftir Heiðdísi Norðfjörð, sem byggt er á ljóðum Kristjáns frá Djúpalæk, þekkja margir. Tónlist Heiðdísar og Ragnhildar Gísladóttur, við ljóð Kristjáns um Pílu Pínu, hefur flutt heilar kynslóðir á ævintýraslóðir.

Það er föngulegur hópur leikara, söngvara, hljóðfæraleikara og brúða sem skapar heim Pílu Pínu, litlu hagamúsarinnar sem breytti heiminum. Tónlistin úr Pílu Pínu liggur nærri hjartarótum heillar kynslóðar af Íslendingum og fá áhorfendur loks tækifæri til að heyra hana með lifandi undirleik klassískrar hljómsveitar í Hamraborg.

Hér kynnumst við sameiningarkrafti Menningarfélags Akureyrar en þessi 318. sviðsetning Leikfélags Akureyrar er sett upp í samstarfi við Sinfóníuhljómsveit Norðurlands og Menningarhúsið Hof.

Höfundur: Heiðdís Norðfjörð, byggt á ljóðum Kristjáns frá Djúpalæk

Tónlist: Heiðdís Norðfjörð og Ragnhildur Gísladóttir

Leikgerð: Sara Marti Guðmundsdóttir og Sigrún Huld Skúladóttir

Leikstjóri: Sara Marti Guðmundsdóttir

Tónlistarstjóri: Þorvaldur Bjarni Þorvaldsson

Búningar, leikmynd og brúður: Margrét Einarsdóttir og Rebekka Austmann Ingimundardóttir

Ljósahönnun Magnús Arnar Sigurðarson

Myndbandshönnun Ingi Bekk

Danshöfundur Katrín Mist Haraldsdóttir

Teiknarar Dan Denton og Ana Stefaniak

Leikarar: Thelma Hrönn Sigurdórsdóttir, Þórunn Lárusdóttir, Benedikt Karl Gröndal, Saga Jónsdóttir, Kjartan Darri Kristjánsson, Eik Haraldsdóttir, Eyþór Daði Eyþórsson, Bjarklind Ásta Brynjólfsdóttir, Freysteinn Sverrisson og Jón Páll Eyjólfsson

Kaupa miða