Djókaín í Hofi.

Listamaðurinn, uppistandarinn og þáttagerðarmaðurinn Hugleikur Dagsson mun fara með uppistandið Djókaín í Hofi fimmtudaginn 19. desember kl. 20. Þetta er í annað sinn sem Hugleikur kemur til Akureyrar með þessa sýningu en síðast var uppselt. Vegna fjölda áskoranna þá var ákveðið að endurtaka leikinn svona rétt fyrir jólahátíðina og gera heiðarlega tilraun til að koma Norðlendingum í gott jólaskap. Þess ber að geta að þetta er í allra síðasta sinn sem Hugleikur flytur uppistandið Djókaín og því síðasta tækifærið til að hlægja sig máttlausan af barnalegum dónaskap hans.

Djókaín er bannað börnum yngra en 16 ára, nema að viðkomandi barn sé í fylgd með fullorðnum og þá helst fullorðnum sem barnið þekkir því annars væri það skrýtið.

Miðasala fer fram á miðasöluvef Hofs, www.menningarhus.is, og í miðasölu Hofs. Miðaverð er aðeins 2.000 kr.