Jenný Lára Arnórsdóttir kynnir einleikinn Elska í Rýminu

Elska einleikur sem unnin er út frá raunverulegum ástarsögum Þingeyinga. Jenný Lára Arnórsdóttir kynnir vinnu sína við einleikinn Elska í Rýminu, fimmtudaginn 14. nóvember kl. 17:00.

Jenný Lára Arnórsdóttir, leiklistarkona, vinnur nú að leiksýningu sem er unnin út frá ástarsögum Þingeyinga. Hún hefur dvalið í vinnustofu hjá Leikfélagi Akureyrar undanfarna viku. Markmið verksins er að draga fram í dagsljósið sannar ástarsögur okkar tíma og miðla þeim í leikverki sem flutt verður í desember í sveitarfélögunum í Þingeyjarsýslum. Tekin voru upp viðtöl við pör og einstaklinga, á aldrinum 24-78 og út frá þeim upptökum er handritið svo unnið. Einnig styðst leikarinn við upptökurnar í persónusköpun sinni. Hugmyndin er að skoða hvort að einkenni sannrar ástar séu enn þau sömu í dag og þau voru áður, eða hvort að skilgreining okkar á ástinni hafi breyst í gegnum tíðina.

Jenný Lára er komin á þann stað að búið er að klippa viðtölin niður og raða saman í handrit. Kynningin mun verða um hvernig þessi aðferð er að nýtast, hvaða vandamál hafa komið upp og lausnir á þeim, hvernig það er að vinna með þessari aðferð, vinnuferlið hingað til og hvað tekur næst við í ferlinu, auk þess sem að gestir fá að sjá örstutt brot úr verkinu.

Jenný Lára útskrifaðist sem leikari og leikstjóri úr The Academy of the Science of Acting and Directing (ASAD) í London.  Eftir heimkomu hefur listakonan fengist við leikstjórn, leiklistarkennslu og leik.

Verkefnið er unnið í samvinnu við Menningarráð Eyþings og er hluti af „Aftur heim“ verkefni ráðsins.